MUZIKË – Vdes legjenda e Salsës, Willie Colon, në moshën 75-vjeçare

NJU JORK, 21 shkurt /ATSH/- Legjenda e muzikës salsa, Willie Colón, një nga figurat më ikonike të lëvizjes “Nuyorican” dhe të muzikës latine, ndërroi jetë sot në moshën 75-vjeçare, konfirmoi familja e tij përmes një mesazhi në rrjetet sociale, sipas “NBC News”.

Kohët e fundit, Colon po merrte trajtim mjekësor për shkak të komplikacioneve respiratore.

Një jetë e mbushur me art dhe muzikë

William Anthony Colón Román, i lindur më 28 prill 1950 në South Bronx të Nju Jorkut, ishte një poet, kompozitor, folklorist, trombonist, producent dhe drejtor muzikor.

Gjyshja e tij, Antonia, i transmetoi identitetin portorikan dhe e mësoi të fliste spanjisht, një gjuhë që prindërit e tij e kishin humbur në rrugët e Nju Jorkut.

Ai regjistroi albumin e parë, “El Malo”, me Héctor Lavoe në vitin 1967, duke formuar një nga duetet më të njohura të salsës në diskografinë Fania.

Me Lavoe, Colón solli një frymë të guximshme të rrugës dhe eksperimentimi muzikor, duke lënë një gjurmë të madhe në historinë e salsës.

Gjatë karrierës së tij, Willie Colón publikoi mbi 40 albume, fitoi nëntë çmime “Gold Records” dhe pesë çmime “Platinum Records”, dhe shiti më shumë se 8 milionë kopje në mbarë botën.

Ai bashkëpunoi me artistë të shquar si, Rubén Blades, Héctor Lavoe dhe Celia Cruz, dhe u nominua tetë herë për çmime “Grammy” në kategorinë e muzikës tropikale.

Përveç muzikës, Colón ishte aktivist i shquar, duke përdorur influencën e tij për të mbështetur çështje sociale dhe politike, veçanërisht në komunitetet latine të Nju Jorkut.

Koncerti i tij i fundit në Puerto Rico ishte më 9 gusht 2025 në San Juan, me Orkestrën Filarmonike të Puerto Ricos, nën drejtimin e Maestros Ángel ‘Cucco’ Peña.

Muzika dhe trashëgimia e Willie Colón do të mbeten të pavdekshme. //a.i/