Maqedoni, Parlamenti në faqen zyrtare me Kushtetutën e 1991

Parlamenti i Maqedonisë në faqen zyrtare të internetit mban të publikuar Kushtetutën e vitit 1991, duke mos përfshirë në të, ndryshimet pas konfliktit të vitit 2001. Në faqen zyrtare në tre gjuhët maqedonisht, shqip dhe anglisht është e publikuar Kushtetuta e miratuar në vitin 1991, që shpalli pavarësimin e vendit nga ish-federata jugosllave, e cila nuk u votua nga përfaqësuesit shqiptarë asokohe.

Ndryshimet kushtetuese të bazuara në Marrëveshjen e Ohrit janë përfshirë në fund në formë shtesë të amendamenteve, që janë miratuar nga Parlamenti i Maqedonisë, ndërsa mungon përfshirja e tyre në Kushtetutën e Plotë.

Sipas kushtetutës së vitit 1991, shqiptarët nuk përmenden në dispozitat themelore kushtetuese, duke mos u njohur gjuha, simbolet kombëtare dhe të drejtat e tjera që burojnë nga Marrëveshja e Ohrit. Veprimi i tillë i shërbimeve të Parlamentit është evidentuar edhe nga përfaqësues ndërkombëtar dhe analistë të huaj, të cilët e marrin për bazë Kushtetutën e publikuar dhe të pandryshuar të vitit 1991. Një ditë më parë parlamenti i Republikës së Maqedonisë miratoi njëzëri Ligjin për përdorimin e gjuhës shqipe.

Ligji parashikon që kryetarët e komisioneve të parlamentit nga radhët e shqiptarëve të flasin në gjuhën shqipe, edhe ose nuk është pranuar që seancat në Kuvend të drejtohen në gjuhën shqipe. Në Kuvend deputetët shqiptarë mund t`i marrin ligjet dhe materialet tjera përveç gjuhës maqedonase, edhe në gjuhën shqipe.

Risi është se në njesitë e vetëqeverisjes lokale, qytetarët që përbëjnë mbi 20 për qind të popullsisë së njësive rajonale mund të marrin përgjigje, përveç në gjuhën maqedonase, edhe në gjuhën amtare.