Mashtrimi, spitalet private fshehin fitimet

Spitalet private po fshehin fitimet reale të aktivitetit të tyre duke paguar më pak taksa se sa iu takon. Ky është konstatimi që vjen nga Drejtoria e Përgjithshme e Tatimeve, e cila shfaq të njëjtat ankesa edhe për kompanitë e ndërtimit dhe sektorin e hoteleri-turizmit në vendin tonë.
Fshehja e xhiros
Shumica prej këtyre subjekteve deklarojnë xhiro më të vogël; kryesisht shërbimi hotelier dhe ai shëndetësor privat, duke iu shmangur tatimit real që duhet të paguajnë. Administrata tatimore i ka bërë thirrje këtyre subjekteve të korrigjojnë deklarimet e tyre, sepse në të kundërt do të gjobiten. “Për vitin 2013 janë përcaktuar si sektorë ekonomik në risk hoteleri-turizmi, shërbimet shëndetësore private si dhe sektori i ndërtimit. Këta sektorë gjatë 2012-ës kanë shfaqur nivel të ulët pajtueshmërie me ligjin, shmangien nga detyrimi për të deklaruar dhe paguar realisht aktivitetin e tyre ekonomik. Vetëm në drejtorinë rajonale tatimore Tiranë, sektori i shërbimeve shëndetësore private, përfaqëson katër për qind të totalit të tatimpaguesve të regjistruar për tatimin mbi vlerën e shtuar dhe disa prej tyre vazhdojnë të deklarojnë xhiro vjetore nën 2 milionë lekë, tha dje Erjon Prifti, nga Drejtoria e Përgjithshme e Tatimeve. Veç shëndetësisë, tatimet kanë dyshime për evazion edhe tek kompanitë e ndërtimit dhe ato të hoteleri-turizmit.
Apeli
Tatimet i bëjnë thirrje këtyre kompanive që të tërheqin mbrapsht bilancet e dorëzuara dhe t’i korrigjojnë ato në të kundërt do përballen me masa të forta ndëshkimore. “Ju është bërë thirrje që brenda datës 30 qershor të vitit 2013 të korrigjojnë deklaratat e tyre, në mënyrë që të shmangin penalizimet gjatë veprimeve që do të ndërmarrë më vonë administrata tatimore”, tha Prifti.
Diferenca
Nga analiza e riskut tek këto grupe tatimpaguesish, janë konstatuar diferenca midis xhiros së deklaruar dhe aktivitetit të tyre gjatë vitit të kaluar, ndaj Administrata Tatimore i ka përcaktuar këta sektorë me risk për vitin 2013. Shmangia e taksave ka bërë që edhe të ardhurat në buxhet të jenë shumë herë më të ulëta se vitet e kaluar. Sipas të dhënave zyrtare, mësohet se për herë të pas disa vitesh buxheti po përballet me rënie të ndjeshme të ardhurave nga taksat; ku në katër muajt e parë, të këtij viti u mblodhën rreth 30 milionë dollarë më pak se viti i kaluar dhe rënia më e fortë është pikërisht te Tatimi mbi Vlerën e Shtuar.