Ministri i Kosovës Hoxhaj të mërkurën para KS të OKB-së

Ministri i Jashtëm i Kosovës Enver Hoxhaj, ka udhëtuar për një vizitë zyrtare në Shtetet e Bashkuara të Amerikës. Gjatë qëndrimit në New York, Ministri Hoxhaj, do të zhvilloj takime me shumë diplomatë amerikanë, përfaqësues të Senatit të SHBA-së dhe përfaqësues të tjerë të lartë shtetëror të administratës amerikane.
Ministri Hoxhaj do të ketë takime edhe me përfaqësues të shteteve që ende nuk e kanë njohur pavarësinë e Kosovës, në kuadër të lobimit për të rritur numrin e njohjeve për shtetin e pavarur dhe sovran të Kosovës, thuhet në një njoftim të MPJ-së.
Hoxhaj thuhet se do të kërkoj nga përfaqësuesit e këtyre shteteve që ta njohin sa më parë pavarësinë e Kosovës.
“Më datë 8 shkurt, Ministri i Jashtëm i Kosovës, Enver Hoxhaj, do të marrë pjesë në mbledhjen e radhës të Këshillit të Sigurimit të Organizatës së Kombeve të Bashkuara, ku do të prezantohet dhe diskutohet raporti i Sekretarit të Përgjithshëm të OKB-së, Ban Ki Moon” thuhet më tej në deklaratë.
Ministri Hoxhaj para përfaqësuesve të shteteve anëtare të Këshillit të Sigurimit, do të shpalos progresin e vazhdueshëm që po shënohet në Kosovë, reformat e gjithëmbarshme që po realizohen nga institucionet kosovare, si dhe për aspekte të tjera të konsolidimit të shtetit të Kosovës.
Hoxhaj në KS të OKB-së, do të kërkoj mbështetje për shpërbërjen dhe largimin e strukturave paralele serbe nga veriu i Kosovës, si parakusht për paqe dhe stabilitet në tërë rajonin.