Moska paralajmëron Britaninë dhe Francën: Po luani me zjarrin me ndihmën ushtarake ndaj Kievit

Londra dhe Parisi “po luajnë me zjarrin” me vendimin për të transferuar teknologji ushtarake raketore në Ukrainë. Paralajmërimi është bërë nga zëdhënësja e Ministrisë së Jashtme ruse, Maria Zakharova, e cila tha se ky vendim mund të ketë pasoja të paparashikueshme.

Sipas Zakharovës, transferimi i teknologjisë raketore nga Britania dhe Franca synon të shmangë përgjegjësinë për sulmet ukrainase ndaj infrastrukturës civile në territorin rus.

Zyrtarja ruse paralajmëroi se Moska mund të godasë objektiva ushtarake britanike brenda dhe jashtë Ukrainës, në përgjigje të sulmeve me raketa ndaj Rusisë.

“Çdo kontingjent ushtarak i huaj i vendosur në Ukrainë që pengon të ashtuquajturin operacion special ushtarak të Rusisë është kategorikisht i papranueshëm dhe do të bëhet një objektiv legjitim i forcave ruse”, deklaroi Zakharova.

Paralajmërimi vjen pak ditë pasi Britania dhe Franca shprehën gatishmërinë për të forcuar mbështetjen ushtarake për Ukrainën, përfshirë aksesin në teknologji të klasifikuar dhe furnizime më të shpejta me raketa të mbrojtjes ajrore.

Gjatë vizitës në Ukrainë, kryeministri britanik Andy Burnham deklaroi se Londra do t’i mundësojë Kievit akses në teknologji të klasifikuar për të nisur prodhimin e raketave me rreze të gjatë veprimi Storm Shadow.

/rtsh.al/