NATO mban samitin në Lituani/ Kërcënon Moska: Do jetë në rrezen e centralit bërthamor

Zëdhënësja e Ministrisë së Jashtme të Rusisë Maria Zakharova ka deklaruar sot se liderët e NATO-s duhet të diskutojnë mbi centralin bërthamor të Zaporizhzhias (ZNPP) në Ukrainë në samitin që do të mbahet në Lituani më 11 dhe 12 korrik, pasi shumica e anëtarëve të aleancës do të gjenden në zonën e goditjes direkte.

Në deklaratën e saj, Zakharova citoi zëvendësministren e Mbrojtjes së Ukrainës, Hanna Maliar, e cila tha të shtunën se ishin “ mbushur 273 ditë që nga goditja e parë në urën e Krimesë për të ndërprerë logjistikën e rusëve”.

Zakharova u përgjigj duke e quajtur Ukrainën një regjim terrorist.

“Tani ata kanë nisur një plan për ‘shpëtimin e tyre’ – dëmtim sistematik të Zaporizhzhias. Samiti i NATO-s duhej të fokusohet pikërisht në këtë temë. Në fund të fundit, shumica dërrmuese e anëtarëve të Aleancës do ta gjejnë veten në zonën e goditjes direkte,” tha ajo.

Alarmi filloi të përhapet javën e kaluar pasi presidenti ukrainas Volodymyr Zelensky pretendoi se trupat ruse vendosën objekte që ngjasojnë me eksploziv në çatitë e centralit bërthamor ndoshta për të simuluar një sulm ndaj këtij centrali.

Centrali bërthamor ka qenë nën kontrollin e trupave ruse që nga marsi i vitit të kaluar, por ka vazhduar të operohet nga stafi ukrainas, i cili fillimisht raportoi se ishte i detyruar të punonte nën armë nga trupat ruse.

Presidenti rus Vladimir Putin ka flirtuar prej kohësh me këtë spektër bërthamor që nga fillimi i pushtimit të Ukrainës – por komentet e Zelenskyt ngritën perspektivën se ai mund të shkaktojë një incident bërthamor jo duke shkrepur kokat e armëve bërthamore, por duke e kthyer centralin bërthamor në një armë më vete.

Megjithatë, pretendimi i Zakharova se “shumica” e anëtarëve të NATO-s do të gjenden në zonën e goditjes direkte është i rremë, transmeton CNN.

Secili nga gjashtë reaktorët në ZNPP janë vënë në një modalitet të “mbylljes së ftohtë” – për shkak të një ndërhyrjeje të paprecedentë nga mbikëqyrësi bërthamor i OKB-së – duke kufizuar shanset për një fatkeqësi bërthamore në shkallë të gjerë.

Nëse eksplozivët e raportuar do të shpërthenin, efektet nuk do të rikrijonin llojin e shkatërrimit të parë pas shkrirjes së centralit aktiv të Çernobilit në 1986.

“Një shtëllungë do të dalë nga reaktori ku do të ketë rrezatim aerosol”, shprehet Ëilliam Alberque, drejtor i Institutit Ndërkombëtar për Studime Strategjike dhe Teknologjike të kontrollit të Armëve.

/rtsh.al/