Na ishte dikur… estrada e duhan-cigares/ Humoristi i njohur Muhamet Çekini i rikthehet kujtimeve

Ish-fabrika e duhan-cigares në qytetin e Shkodrës dikur prodhonte cigare për tregun e brendshëm dhe për eksport bashkë më atë të Durrësit.

Duhani që prodhohej në zonën e Nënshkodrës dhe Mbishkodrës grumbullohej dhe magazinohej në ndërtesa të mëdha që tashmë kanë mbetur pjesë e së kaluarës.

Në vitin 1956  kur u ndërtua fabrika do të krijohej edhe estrada e fabrikës, ku pjesë e saj do të bëhej në moshën 24-vjeçare, aktori i njohur i humorit Muhamet Çekini.

Sot 75 vjeç ai e kujton me nostalgji kohën kur punonte në këtë fabrikë dhe përvojën si mekanik për riparimin e makinerive.

“Kam filluar punë në moshën 21-vjeçare si mekanik”, tregon ai.

Vetëm një pjesë e ish-fabrikës është privatizuar por aty nuk prodhohet duhan por këpucë. Të gjitha godinat e tjera të mëdha kanë degraduar.

“Ndërtesa ka qenë fabrika e vjetër e cigares, më vonë u bë një fabrikë e re, por ndërtesa e vjetër ka rezultuar më rezistente,” shtoi ai.

Në vitin 1999 godinat e ish fabrikës së duhan- cigares shërbyen për strehimin e familjeve kosovare të cilët u larguan nga lufta.

Në ato kohëra, Muhameti do të rikthehej sërish por jo për të punuar si mekanik por për t’i shërbyer vullnetarisht si ndihmës kuzhinier shtetasve kosovarë.

Ish-fabrika e duhan-cigares shërbeu edhe si fidanishte për estradën e Shkodrës duke nxjerrë ikona të këngës dhe humorit shkodran.

“Fermentimi i duhanit ka qenë finanishtja e estradës profesioniste. Këtu janë formuar të gjithë ata ata që kanë marrë pjesë në ekstradë si Tan Banushi, Gëzim Kruja, Bujar Qamili etj.” shprehet humoristi.

Në fabrikën e duhan-cigares dikur punonin rreth 2 mijë persona, ndërsa sot kapanonet janë shkatërruar dhe bimësia ka mbuluar gjithandej të gjithë sipërfaqen. 

Në ato vite Shkodra dhe Shqipëria krenohej nga tre fabrika ajo e duhanit, ish fabrika e letrës dhe ish uzina e telit që mbanin peshën e ekonomisë shkodranë, kurse sot ato mbeten kujtime të së kaluarës.

Gazetar: M. Rakaj

/rtsh.al/