Ndalohen marinarët shqiptarë, u furnizuan me armë serbe në Mal të Zi

Tre marinarë shqiptarë janë ndaluar në Jemen dhe ndodhen në gjyq, pasi akuzohen për trafik të paligjshëm armësh.

Marinarët shqiptarë drejtonin një anije me flamur të Maldiveve, ngarkesa e të cilës ishte 180 tonë armatim dhe municione.

Kapiteni i anijes, Arif Bakillari, thotë se ngarkesa është e rregullt, se ajo kishte si destinacion Irakun dhe se në një pjesë të udhëtimit janë shoqëruar edhe nga anijet e NATO-s, transmeton tch.

Por me të mbërritur në port në Jemen, dhjetorin e shkuar, për të marrë furnizim me karburant, autoritetet vendore i kanë ndaluar tre shqiptarët dhe tashmë ata kanë dalë përpara një gjykate nën akuzën e shkeljes së ligjeve vendase dhe atyre ndërkombëtare.

Një histori kjo tepër misterioze, pasi anija është nisur nga Greqia, është furnizuar në një nga portet e Malit të Zi, ndërsa armët janë prodhim serb./Indeksonline/