Ndërron jetë në spital një i dënuar nga Fieri, prej ditësh po trajtohej në Urgjencën e QSUT-së

Drejtoria e Përgjithshme e Burgjeve ka njoftuar sot vdekjen e një shtetasi që vuante masën e mjekimit të detyruar në sistemin penitenciar. Sipas të dhënave të para zyrtare, pacienti me inicialet A.B., i datëlindjes 1 korrik 1953, lindur dhe banues në Fier, ka ndërruar jetë sot rreth orës 12:20 në ambientet e Qendrës Spitalore Universitare “Nënë Tereza” (QSUT) në Tiranë.

I ndjeri ishte i dënuar më parë për veprën penale “Vrasje me dashje” dhe që prej datës 27 nëntor 2021 ishte transferuar në Institucionin e Ekzekutimit të Vendimeve Penale (IEVP) në Lezhë, ku ndodhej nën efektin e një mase mjekësore të përcaktuar nga gjykata.

Përkeqësimi i gjendjes shëndetësore të pacientit ka nisur ditë më parë në ambientet e IEVP Lezhë, çka ka detyruar stafin mjekësor të burgut të ndjekë protokollin e urgjencave. Pas shfaqjes së simptomave të rënda, ai është dërguar fillimisht për ndihmë të parë në Spitalin Rajonal të Lezhës. Për shkak të nevojës për trajtim më të specializuar, pacienti është transferuar drejt Tiranës, ku qëndronte i shtruar në urgjencën e QSUT-së që prej datës 17 maj 2026.

Pavarësisht asistencës mjekësore të mjekëve të reanimacionit, 72-vjeçari nuk ka mundur të mbijetojë. Sipas informacionit paraprak të lëshuar nga kartela mjekësore e spitalit, si shkak zyrtar i vdekjes është regjistruar “arrest kardiak”.

Si në çdo rast të vdekjes së personave me liri të kufizuar apo nën masa mjekësore të detyruara, institucionet kanë nisur verifikimet standarde. Në njoftim specifikohet se “rasti po ndiqet sipas procedurave përkatëse”, ku përfshihet njoftimi i Prokurorisë, kryerja e ekspertizës ligjore nga Instituti i Mjekësisë Ligjore për të konfirmuar shkaqet natyrale të vdekjes, si dhe njoftimi zyrtar i familjarëve të të ndjerit, të cilëve institucionet u kanë shprehur ngushëllimet.

/rtsh.al/