Ndërtimi i rrugëve dytësore shtyhet nga 2009 në 2013

Ndërtimi i 1500 kilometrave rrugë dytësorë do të nisë këtë vit dhe do të përfundojë në vitin 2013 përkundër premtimit të qeverisë se ato do të ndërtoheshin brenda vitit 2009. Fondi Shqiptar i Zhvillimit, (FSHZH), Agjenci implementuese e qeverisë shqiptare, në bashkëpunim me Bankën Botërore, organizuan dje në Tiranë, një takim me firmat e ndërtimit që punojnë në sektorin e ndërtimit të rrugëve, me qëllim njohjen e firmave të ndërtimit me projektin e “Rrugëve Dytësore dhe Lokale”. Banka Botërore, si një prej donatorëve kryesorë kërkoi që kompanitë e ndërtimit, të cilat do të punojnë me këtë plan të madh, të përdorin të gjitha kapacitetet e tyre, në mënyrë që afatet dhe cilësitë e rrugëve të jenë ato që do të kërkohen nga kontratat. Në të vërtetë i tërë projekti parasheh rreth 400 milionë dollarë, të cilat do të shpenzohen gjatë pesë viteve, mirëpo përqindja e realizmit të investimeve të huaja është mjaft e ulët dhe sidomos investimet që vijnë nga donatorë të tillë si Banka Botërore kanë vështirësi jo të vogla për t’u çelur. Banka Botërore në përgjithësi, por edhe shumë donatorë, nuk e kalojnë 60% të asaj që parashikohet sa i takon investimeve. Kjo është një praktikë e përbotshme dhe nuk ndodh vetëm në Shqipëri, kësisoj projekti i rrugëve dytësore do ta ketë të vështirë të ruajë pritshmëritë e qeverisë shqiptare. Në takimin që u mbajt dje morën pjesë drejtuesit kryesorë të FSHZH, si edhe rreth 30 përfaqësues të firmave të ndërtimit, të cilat janë të interesuara të marrin pjesë në zbatimin e projekteve të rrugëve.

Drejtori i FSHZH, Benet Beci, në fjalën e mbajtur me këtë rast tha se, “vitet e fundit FSHZH ka punuar shumë në drejtim të cilësisë së punimeve dhe transparencës për krijimin e ambientit për një konkurrence të barabartë. Ne jemi të bindur që nëpërmjet këtij projekti, duke paraqitur cilësitë më të mira të fituara në vite, së bashku me ju, do t'i japim vendit rrugë rurale dhe rajonale me standarde dhe cilësi bashkëkohore”, - tha Beci.

Më pas u vazhdua me prezantimin e përgjithshëm të projektit, specifikimet teknike të rrugëve dhe procedurat e prokurimit. Takimi është pjesë e një cikli konsultimesh që po kryhen në vazhdim me të gjithë aktorët dhe pjesëmarrësit në këtë projekt, duke nisur nga donatorët, pushteti vendor, përfituesit etj. Nëpërmjet këtij takimi synohet gjithashtu rritja e transparencës dhe shtimi i shanseve për konkurrencë të barabartë gjatë procesit të prokurimit, me qëllim garantimin e një produkti cilësor dhe sa më funksional për komunitetet që do përfitojnë prej tij. Ky projekt ka si qëllim përmirësimin e aksesit në shërbimet bazë dhe mundësitë e zhvillimit ekonomik për popullsinë rurale, përfituese në zonat e rrugëve të rehabilituara. Projekti është parashikuar të përfshijë deri në 1500 km rrugë rajonale dhe lokale. Në projekt do të përfshihen një sërë donatorësh si Banka Botërore, Bashkimi Evropian, Banka Japoneze për Zhvillim Ndërkombëtar, Banka për Zhvillim e Këshillit të Evropës, Banka Evropiane për Rindërtim e Zhvillim, Banka Evropiane e Investimeve, gjë që mund ta bëjë edhe më të ngadaltë ecurinë e tij.