Në Arabi, tifozët paguhen të vijnë në stadium

Si të joshen njerëzit të vijnë në stadium për të krijuar atmosferë të ngrohtë gjatë ndeshjeve? Shumë skuadra evropiane ende merren me këtë pyetje.

Kurse, një opsion për zgjidhje vjen nga Emiratet e Bashkuara Arabe. Atje, përkrahësit e futbollit jo vetëm se nuk shpenzojnë për të blerë biletat për të shikuar ndeshjet, por klubet i paguajnë ata që të vijnë në stadium. Kurse, nëse sillen mirë në tribuna, mund të përfitojë edhe bonus.

Në Arabi fitohet mirë. Këtë e di edhe Diego Maradona i cili për kohën sa udhëhoqi skuadrën Al Wasl kishte pagë prej 3.5 milionë eurosh. Por, më interesant është tregimi për tifozët.

“Klubet i paguajnë njerëzit të vijnë në stadium, sepse duan të kenë atmosferë të mirë gjatë ndeshjeve”, deklaroi për të përditshmen arabe The National, nënkryetari i ligës PRO, Abdullah Al Junaibi.

“Ne tifozët i presim si mysafir, kurse si të tillë ata nuk paguajnë bileta. Në vend të tyre, klubet përkujdesen për ta sikur për një mysafir dhe i shpërblejnë ata”, shtoi ai. Sjellja e tij u sjell bonus kurse më së tepërmi paguhen ata që duartrokasin dhe këndojnë gjatë ndeshjeve.