Ngrohja globale po rrit rrezikun e katastrofave ekstreme klimatike

Shkencëtarët po paralajmërojnë se bota po afrohet gjithnjë e më shumë drejt ngjarjeve ekstreme klimatike, ndërsa rritja e temperaturave globale po shton rrezikun për valë të fuqishme nxehtësie, përmbytje, thatësira, zjarre dhe stuhi.

Sipas ekspertëve, ajo që dikur dukej si skenar i filmave po bëhet gjithnjë e më e mundshme. Temperatura mesatare globale ishte rreth 1.44°C më e lartë në vitin 2025 krahasuar me fillimin e viteve 1800, ndërsa përqendrimi i gazeve serrë në atmosferë vazhdon të rritet.

Vitet e fundit kanë sjellë disa prej ngjarjeve më ekstreme të regjistruara. Nga zjarret masive në Australi dhe përmbytjet katastrofike në Pakistan, te uraganet në SHBA dhe valët e nxehtësisë në Evropë e Azi, pasojat e ndryshimeve klimatike po bëhen gjithnjë e më të dukshme.

Shkencëtarët theksojnë se edhe nëse bota do të arrinte menjëherë emetime neto zero, temperaturat dhe efektet e ngrohjes globale nuk do të zhdukeshin. Dioksidi i karbonit mund të qëndrojë në atmosferë për qindra vjet, ndërsa shumë prej pasojave të ndryshimeve klimatike kërkojnë dekada ose shekuj për t’u zbutur.

Një shqetësim i veçantë janë “pikat e kthesës” klimatike, ku dëmtimi i sistemeve natyrore mund të bëhet i pakthyeshëm. Shkencëtarët përmendin si shembuj koralet, të cilat po përballen me zbardhje masive për shkak të temperaturave të larta të oqeaneve, si dhe pyllin tropikal të Amazonës, i cili po kërcënohet nga thatësirat, zjarret dhe shpyllëzimi.

Ekspertët paralajmërojnë gjithashtu se rreziku nuk duhet parë vetëm si një katastrofë e vetme, por si mundësia që disa ngjarje ekstreme të ndodhin njëkohësisht ose njëra pas tjetrës, duke rënduar sistemet energjetike, bujqësinë, infrastrukturën dhe ekonomitë.

Sipas shkencëtarëve, sfida nuk është vetëm reduktimi i emetimeve, por edhe përgatitja e qyteteve dhe komuniteteve për një klimë që tashmë ka ndryshuar.

/rtsh.al/