Nis takimi Kurti-Abdixhiku/ Kreu i Lëvizjes së Vetëvendosjes: Kemi mundësi reale për marrëveshje

Kryetari i Lëvizjes Vetëvendosje, Albin Kurti, dhe kreu i Lidhjes Demokratike të Kosovës, Lumir Abdixhiku, kanë nisur takimin e radhës në ambientet e Kuvendit të Kosovës.

Takimi zhvillohet në kuadër të përpjekjeve për të gjetur një marrëveshje politike për zgjedhjen e presidentit të ri të Kosovës, çështje që vazhdon të jetë në qendër të negociatave mes dy partive.

Para takimit, Kurti u shpreh optimist për mundësinë e arritjes së një marrëveshjeje, duke theksuar se ekziston vullnet politik nga të dyja palët.

“E kemi vullnetin e mirë, i kemi mundësitë reale. Tash po ecim përpara siç po e shihni dhe urojmë të mbërrijmë në një marrëveshje”, deklaroi Kurti para mediave.

Ky është takimi i radhës mes Kurtit dhe Abdixhikut, pas disa raundeve të diskutimeve që deri tani nuk kanë prodhuar një marrëveshje konkrete.

Çështja e presidentit konsiderohet vendimtare për tejkalimin e ngërçit institucional në Kosovë, ndërsa vëmendja tash është përqendruar te rezultati i takimit të sotëm.

Nëse palët arrijnë pajtueshmëri, kjo mund t’i hapë rrugë zhbllokimit të procesit institucional. Në të kundërtën, kriza politike mund të vazhdojë edhe më tej.