Një grup vendesh europiane dhe Australia dënojnë sulmet izraelite në Liban
Një grup vendesh evropiane dhe Australia kanë dënuar “në termat më të ashpër” sulmet masive izraelite në Liban javën e kaluar, si dhe sulmet ndaj paqeruajtësve të OKB-së.
Në një deklaratë të përbashkët, ministrat e Jashtëm të Australisë, Belgjikës, Kroacisë, Danimarkës, Finlandës, Francës, Greqisë, Islandës, Luksemburgut, Maltës, Norvegjisë, Portugalisë, Sllovenisë, Spanjës, Suedisë, Mbretërisë së Bashkuar, si dhe administratës greke të Qipros, ripohuan se integriteti territorial i Libanit duhet të respektohet plotësisht.
Ata kërkuan që Libani të përfshihet në përpjekjet rajonale për de-eskalim dhe u bënë thirrje të gjitha palëve që të punojnë për një zgjidhje politike të qëndrueshme.
Deklarata paralajmëroi se vazhdimi i luftës në Liban rrezikon de-eskalimin aktual rajonal, “të cilin e kemi mirëpritur dhe që duhet të respektohet plotësisht nga të gjitha palët”.
Ministrat e Jashtëm mirëpritën iniciativën e Presidentit libanez Joseph Aoun për të hapur bisedime të drejtpërdrejta me Izraelin, si dhe pranimin e Tel Avivit për të filluar negociata të lehtësuara nga SHBA-të. Ata u bënë thirrje të dyja palëve që të shfrytëzojnë këtë mundësi.
“Bisedimet e drejtpërdrejta mund të hapin rrugën për siguri të qëndrueshme për Libanin dhe Izraelin, si dhe për rajonin”, thuhet në deklaratë, duke u bërë thirrje të gjitha palëve që “të de-eskalojnë urgjentisht” dhe të shfrytëzojnë mundësinë e ofruar nga armëpushimi midis SHBA-së dhe Iranit.
Deklarata dënon sulmet e Hezbollahut kundër Izraelit, duke thënë se ato “duhet të ndalen menjëherë”.
“Ne dënojmë gjithashtu në termat më të ashpër sulmet masive izraelite në Liban të kryera më 8 prill, të cilat, sipas informacioneve të fundit të dhëna nga autoritetet libaneze, kanë rezultuar në vdekjen e më shumë se 350 personave dhe plagosjen e më shumë se 1000 të tjerëve.
Ne dënojmë gjithashtu në termat më të ashpër sulmet ndaj UNIFIL-it dhe ripohojmë se siguria dhe mbrojtja e paqeruajtësve të OKB-së duhet të sigurohet në çdo kohë.”
Duke shprehur solidaritetin e plotë dhe mbështetjen e palëkundur për popullin dhe autoritetet libaneze, ministrat e Jashtëm ripohuan rëndësinë e respektimit të integritetit territorial dhe sovranitetit të Libanit, si dhe zbatimit të plotë të rezolutës 1701 të Këshillit të Sigurimit të Kombeve të Bashkuara.
/rtsh.al/