Një pensionist grek vret veten në qendër të Athinës

Një pensionist grek ka vrarë veten me armë zjarri në sheshin para parlamentit në Athinë, pasi kishte thënë se borxhet po e detyrojnë që të vrasë veten.

Vetëvrasjet kanë shënuar rritje në Greqi, në kohën kur ky vend po përballet me krizë të thellë ekonomike dhe ku çdo i pesti qytetar është i papunë.

Policia greke tha se dy dëshmitarë kanë parë farmacistin e pensionuar 77 vjeçar, duke vënë armën në kokë në Sheshin Sintagma në Athinë dhe duke tërhequr këmbëzën e armës.

“Kam borxhe, nuk mund të duroj dot më”, raportohet të ketë bërtitur viktima.

Një letër vetëvrasjeje është gjetur në xhaketën e tij, në të cilën ai fajëson politikanët dhe telashet financiare për fatin e tij.