Nuk arrestoi shtetasin e shpallur në kërkim, AMP ndalon policin në pikën e Hanit të Hotit

Një polic i pikës kufitare të Hanit të Hotit është ndaluar nga Agjencia e Mbikqyrjes policore pasi akuzohet për shpërdorim detyre dhe korrupsion.

Dyshohet se efektivi nuk ka marrë masa në lidhje me një shtetas i cili rezultonte i shpallur në kërkim nga Interpol.

Njoftimi:

Agjencia e Mbikëqyrjes Policore (Rajoni Shkodër – Lezhë), ka ekzekutuar urdhërin e ndalimit të punonjësit të policisë Inspektor P.Q., me detyrë Kontrollor pranë Pikës së Kalimit Kufitar Hani i Hotit, i dyshuar për veprat penale “Shpërdorim i detyrës” dhe “Korrupsion pasiv i personave që ushtrojnë funksione publike”.

Nga hetimet rezultoi se punonjësi i policisë nuk ka marrë masat për ndalimin e një shtetasi malazez, i cili gjatë verifikimit nga pika e kontrollit, rezultoi në kërkim nga Interpoli.

Hetimet vazhdojnë për zbardhjen e plotë dhe përfshirjen e mundshme të punonjësve të tjerë në këtë ngjarje. /vizionplus.tv