OKB paralajmëron kundër ndërhyrjes ushtarake shtesë në konfliktin Izrael-Iran

Sekretari i Përgjithshëm i Kombeve të Bashkuara, Antonio Guterres, ka bërë thirrje të mërkurën kundër çdo “ndërhyrjeje shtesë ushtarake” në konfliktin midis Iranit dhe Izraelit, duke paralajmëruar për pasoja të rënda jo vetëm për palët e përfshira, por edhe për të gjithë rajonin dhe sigurinë ndërkombëtare.

Në një deklaratë të lëshuar, Guterres theksoi se “çdo ndërhyrje ushtarake shtesë mund të ketë pasoja të mëdha, jo vetëm për ata që janë të përfshirë, por për të gjithë rajonin dhe për paqen dhe sigurinë ndërkombëtare në përgjithësi.” Kjo thirrje vjen në një kohë kur Presidenti i SHBA-së, Donald Trump, thuhet se po shqyrton përdorimin e aseteve ushtarake amerikane për të goditur objektet bërthamore iraniane.

Vetë Trump, duke folur sot mbi mundësinë e veprimeve të SHBA-së kundër Iranit, deklaroi: “Mund ta bëj, mund të mos e bëj.” Deklarata e Guterres nënvizon shqetësimin global në rritje për përshkallëzimin e konfliktit dhe rrezikun e “ndërkombëtarizimit të mëtejshëm” të tij.

/rtsh.al/