Ofertë për plaçkitje
Enis Veliu
Më pak se një muaj kanë mbetur, kur edhe zyrtarisht në Kosovë do të nisë fushata parazgjedhore, për zgjedhjet komunale që do të mbahen më 3 nëntor të këtij viti. Përplot 30 ditë para opinionit do të dalin edhe një herë për të kërkuar votën e elektoratit pjesa dërmuese e kryetarëve aktualë të komunave të Kosovës. Përjashto kandidatin e PDK-së për kryetar të komunës së Skenderajt, Sami Lushtaku, i cili edhe më tej vazhdon të mbahet në paraburgim, si i dyshuar për krime lufta nga prokuroria e EULEX-it. Lushtaku nga burgu do të marrë besimin e elektoratit për të drejtuar komunën edhe për një mandat, nëse prokurori i EULEX-it Mauricio Salustro kërkon që Lushtaku edhe më tej të mbahet në paraburgim. E në të kundërtën, Lushtaku mund t’i bashkohet elektoratit dhe të marrë pjesë në fushatë, edhe pse dorën në zemër fundi dihet. Si në rastin e parë, ashtu edhe në të dytin, ai do të jetë kryetar komune. Atë po e do populli, edhe pse ky nuk ka bërë shumë për atë. Mirëpo, pa asnjë problem në garë po hyjnë edhe “shokët” e Lushtakut. Ata (shokët) për momentin janë duke jetuar më familjet e tyre dhe janë duke ushtruar funksionet e tyre, edhe pse ndaj disave ka kohë që është kon- firmuar aktakuza për abuzim me financa publike. Ramadan Muja, Qemajl Mustafa, e shumë e shumë të tjerë, edhe një herë po i hyjnë garës si kandidatë për kryetarë komunash. Muja edhe më tutje vazhdon të jetë kandidat i Partisë Demokratike të Kosovës (PDK) për Prizrenin, apo “Jerusalemin” e Hashim Thaçit. Ndërkaq i dyti për Gjilanin, komunën më të madhe në rajonin e Anamoravës. Askush nuk e ka pritur këtë, përveç shefit të partisë Hashim Thaçi. Ky i fundit në minutat e fundit para se të dorëzohej lista për certifikim në KQZ e mori një vendim të tillë që thuajse pa e pyetur askënd. Ndoshta i mirë për të, por ofendues dhe irritues për masën. Për ata që do të dalin në zgjedhje Kandidimi i Ramadan Mujës dhe Qemajl Mustafës, janë goditje shumë të rënda që lideri i PDK-së Hashim Thaçi i ka bërë elektoratit të tij në komunën që e quan “Jerusalem” të partisë së tij, por edhe në komunën e Gjilanit. Në rastin e parë, Muja kësaj radhe do ta këtë më të rëndë garën, pasi që edhe njerëzit e tij të afërm janë larguar nga ai. Rast i njëjtë sikurse i Prizrenit, apo ndoshta edhe më i rëndë është ai i komunës së Gjilanit, Qemajl Mustafa. Në forma dhe mënyra të ndryshme Mustafa ka rritur volumin e parave në llogarinë e tij private, e në anën tjetër e ka shkatërruar arkën e shtetit. Borxhet e kësaj komune gati kanë arritur sa buxheti vjetor. Të bëmat e mëdha të Mujës e Mustafës janë shumë herë më të mëdha se ditët e fushatës parazgjedhore. Komunat në Kosovë do të duhej të drejtohen nga njerëz me dinjitet të lartë moral e profesional, e jo nga njerëz të inkriminuar që në vazhdimësi kanë abuzuar me fonde dhe asete publike.
(Marrë me shkurtime nga “Koha Ditore” në Kosovë)