Opozita bllokon rrugët, protesta pritet të paralizojë Tiranën, Berisha: Sot dita e revoltës
Kryetari i PD Sali Berisha ftoi qytetarët ti bashkohen sot në orën 17.00 mosbindjes civile të opozitës.
Gjatë një konference me gazetarët, Berisha deklaroi se revolta e opozitës organizohet në emër të të gjithë qytetarëve për të cilët jetesa është bërë më e vështirë se 10 vite më parë.
“Sot është dita e një revolte, e mosbindjes civile, të PD-së dhe opozitës, në emër të mbi 1.1 milion shqiptarëve që u larguan nga Shqipëria nga ky regjim për shkak të varfërisë dhe privimit të lirive. Është revolta në emër të 800 mijë pensionistëve, që u trajtuan nga kjo qeveri në mënyrën më çnjerëzore”, tha Berisha.
Opozita do të bllokojë 5 akset kryesore në Tiranë, kryqëzimin tek rruga e Elbasanit, sheshin para bashkisë së Tiranës, sheshin Uillson, zonën tek Pallati me Shigjeta dhe Zogun e Zi.
“Ftoj qytetarët e Tiranës dhe mbarë Shqipërisë sot në ora 5, marshim në Tiranë, Tirana në duart e qytetarëve”, shtoi kreu i PD-së
Nga ana tjetër Berisha u ndal edhe tek debati më i fundit për mbylljen e rrjetit social TikTok. Kryetari i PD Berisha akuzoi kryeministrin Edi Rama për censurë.
“Unë nuk them se kanë anë negative, por elementët që i keqpërdorin, duhen kontrolluar ata dhe jo TikToku, dhe jo FB, Instagrami apo mediat e tjera. E dënoj me ashpërsinë më të madhe”, përfundoi Berisha.
Berisha deklaroi se në rast të fitores së PD ne 11 maj, ai do të rihap rrjetin Tik Tok.