PD dënon ndalimin e gazetares së Citizens Channel: Përpjekje politike për të ndikuar informimin e publikut

TIRANË, 23 korrik/ATSH/ Partia Demokratike dënoi ndalimin e gazetares së Citizen Channel, Vjolanda Peca, nga policia gjatë ditës së sotme.

Në një deklaratë të zyrës së Shtypit në PD, thuhet se, ndalimi i gazetares është përpjekje politike për të ndikuar informimin e publikuar duke trembur reporterët në terren.

“PD dënon ndalimin e gazetares së Citizens Channel, Vjolanda Peca, si mospërmbajtje dashakeqe dhe përpjekje politike e policisë së Ramës për të frikësuar gazetarët dhe mediat e lira. Në një rast të paprecedent në Europë, por familjar në Bjellorusinë e Lukashenkos, Policia e Shtetit pengon një gazetare të kryejë detyrën dhe e ndalon atë pa shkak, pa arsye, pa të drejtë”, thuhet në reagimin e PD-së.

PD thekson se ky nuk është vetëm cënim i së drejtës për raportim dhe informim publik, por edhe përpjekja për t’i mbajtur gazetarët larg vatrave të ngjarjeve, me qëllimin e vetëm që ato të manipulohen më lehtë, siç ka bërë kaq herë Policia e Shtetit.

Partia Demokratike shprehu mbështetjen për gazetaren dhe median Citizens Channel, të cilën e cilësoi si “një prej burimeve të informacionit ende të pandotur”.

/m.m/a.f/