PDIU përshëndet vendimin GNK: Të punohet për integrimin

Partia Drejtësi, Integrim dhe Unitet përshëndet vendimin e Grupit Ndërkombëtar të Kontrollit për dhënien fund të mbikqyrjes së pavarësisë së Kosovës. Në një deklaratë për mediat PDIU shprehet se ky është një hap i nevojshëm për krijimin e një shteti mirëfuksionues dhe demokratik.
 

“Për kombin tonë, fundi i pavarësisë së mbikqyrur do të thotë pavarësi dhe sovranitet i plotë në vendimmarrje dhe shtetformim për shtetin e dytë të kombit shqiptar në Ballkan. Heqja e sanksioneve kushtetuese që diskriminojnë institucionalisht shqiptarët në Kosovë, karshi pakicave, si vendet e rezervuara për minoritetet disa herë më shumë se sa këto minoritete përfaqësojnë, etj., përbën një hap të rëndësishëm për një shtet të stabilizuar të Kosovës”thuhet në deklaratë.
 

PDIU shpreson dhe u bën thirrje faktorëve politik në Kosovë dhe në Shqipëri, që tani e tutje, politikat shtetërore të të dyja palëve të jenë në funksion të integrimit të dy shteteve me njëra-tjetrën, si parakusht i integrimit evropian.
 

PDIU, gjithashtu, vlerëson vendimin e GNK-së për integrim të menjëhershëm të veriut të Kosovës me pjesën tjetër të këtij shteti, dhe përkrah çdo tentativë të institucioneve të Republikës së Kosovës në këtë drejtim.