PE shtyn sërish rezulutën për Shqipërinë
Komiteti i Jashtëm Europarlamentar vendosi dje të votojë paraditen e sotme Rezolutën e raporterit Kuntis për Shqipërinë
Parlamenti Europian ka shtyrë me një ditë miratimin e Rezolutës për procesin integrues të Shqipërisë, ndërsa dje është vënë sërish në dyshim kalimi i saj për paraditen e sotme.
Edhe pse, sipas axhendës së dy ditëve më parë, rezoluta e hartuar nga reporteri për Shqipërinë në Parlamentin Europian, Nikoals Kuntis, parashikohej të miratohej ditën e djeshme, ajo është lënë për t'u votuar paraditen e sotme së bashku me amendamentet e paraqitura nga europarlamentarët.
Në faqen zyrtare të Parlamentit Europian nuk shpjegohet arsyeja e kësaj shtyrjeje, në axhendën e këtij institucioni specifikohet se diskutimi mbi procesin integrues të Shqipërisë në tërësi dhe mbi krizën politike në veçanti, do të mbahet nga ora 09:00 deri në orën 10:00 të paradites së sotme.
Por, edhe votimi për ditën e mërkurë është vënë në dyshim, teksa dje një grup europarlamentarësh kanë kërkuar shtyrjen e Rezolutës.
Eurodeputetët e majtë kanë kërkuar shtyrjen e miratimit të kësaj Rezolute, pasi, sipas tyre, kjo do të ndihmonte në zgjidhjen e krizës politike, kur ende ekziston një draft-marrëveshje si dhe kur ditën e sotme, vjen në Shqipëri kreu i Partive Popullore Europiane, Xhozef Daul, i cili do të takojë Presidentin e Republikës Bamir Topi, Kryeministrin Sali Berisha, zëvendëskryeministrin dhe njëkohësisht ministrin e Jashtëm, Ilir Meta, si dhe kryetaren e Kuvendit, Jozefina Topallin, si dhe një nga përfaqësuesit e opozitës në mungesë të kreut të saj Edi Rama.
Kërkesa e eurodeputetëve të majtë nuk mundi të marrë konsesusin e të gjithë përfaqësuesve të partive europiane, duke bërë që Komisioni i Jashtëm Europarlamentar të vendosë për miratimin e kësaj Rezolute paraditen e sotme.
Kriza politika dhe mundësia e gjetjes së një kompromisi politik midis opozitës dhe mazhorancës në Shqipëri, do të jetë diskutimi kryesor i eurodeputetëve. Kjo problematikë është theksuar edhe në amendamentet e hartuar nga europarlamentarët, të cilat do hidhen në diskutim gjatë shqyrtimit dhe miratimit të Rezolutës së reporterit Kuntis.
Në amendamentet e bashkëngjitura të Rezolutës së Kuntis, theksohet qartë keqardhja për vazhdimin e krizës politike dhe nga ana tjetër kërkohet rivendosja e një dialogu politik për t'i dhënë frymëmarrje Parlamentit në mënyrë që ai të vazhdojë të punojë me aktivitet të plotë, për t'u paraprirë edhe zgjedhjeve vendore të vitit të ardhshëm.