PHENIAN – Koreja e Veriut teston bombën thërrmuese në disa lëshime me raketa balistike
PHENIAN, 20 prill /ATSH-AA/ – Koreja e Veriut njoftoi sot se ka testuar një kokë rakete me bombë thërrmuese pasi kishte lëshuar pesë raketa balistike taktike ‘tokë-tokë’ “Hwasongpho-11 Ra” me rreze të shkurtër veprimi, pas raportimeve nga Koreja e Jugut dhe Japonia për lëshime drejt Detit Lindor.
Në lëshim mori pjesë udhëheqësi i Koresë së Veriut, Kim Jong Un për të vlerësuar aftësinë e kokës së raketës, sipas Agjencisë Qendrore Koreane të Lajmeve (KCNA) shtetërore. Qëllimi i testit ishte të “verifikonte karakteristikat dhe fuqinë e kokës së raketës me bombë thërrmuese dhe kokës së minave fragmentuese të aplikuara në raketën balistike taktike”, raportoi agjencia.
Ajo shtoi se pesë nga raketat taktike goditën një zonë të synuar pranë një ishulli në një distancë prej afërsisht 136 kilometrash me dendësi shumë të lartë. Sipas KCNA, Kim shprehu “kënaqësi të madhe” me lëshimin, duke thënë se ishte me “rëndësi të madhe”.
“Ushtria jonë po monitoron nga afër lëvizjet e ndryshme të Koresë së Veriut nën një qëndrim të fortë mbrojtës të kombinuar Kore-SHBA dhe ruan aftësitë dhe qëndrimin për t’iu përgjigjur çdo provokimi në një mënyrë dërmuese”, tha JCS.
Ministria e Mbrojtjes së Japonisë vuri në dukje gjithashtu lëshimin e raketave balistike, me predhat që me sa duket kanë rënë jashtë zonës ekskluzive ekonomike të Japonisë, pa u raportuar dëme në vend, raportoi Agjencia e Lajmeve Kyodo. /os/