Për Prishtinë evropiane
FC Prishtina të martën edhe zyrtarisht e ka prezantuar shefin e ri të shtabit teknik, Wolfgang Jerat. Prezantimin e trajnerit të ri e ka bërë presidenti i klubit bardh e kaltër, Remzi Ejupi.
Sipas Ejupit, Jerat do ta udhëheqë ekipin kryeqytetas të paktën gjatë stinorit pranveror – por nuk ka treguar detajet financiare të marrëveshjes. Mirëpo, posa të përfundojë ky kampionat, ai ka paralajmëruar se klubi i tij, sipas të gjitha gjasave, do të nënshkruajë kontratë edhe për dy vite tjera me trajnerin gjerman.
Sidoqoftë, krerët e kampionit vjeshtor janë shprehur të lumtur që e kanë bindur Wolfgang Jerat ta marrë drejtimin e skuadrës së tyre. Ata besojnë se gjermani do ta ndihmojë Prishtinën që të përparojë.
“Kemi menduar ta sjellim një frymë të re në futbollin tonë. Ardhja e Jerat në Prishtinë është një dhuratë për gjithë futbollin kosovar. Përveç që do ta udhëheqë skuadrën e parë, trajneri i ri do të angazhohet edhe në riorganizimin e shkollës së futbollit. Njëherësh, Jerat do t’i shfrytëzojë lidhjet e tij, mundësitë e tij, për ta ndihmuar Prishtinën t’u ofrohet standardeve evropiane. Ai mund të ndihmojë në transferimin e futbollistëve tanë nëpër klube të huaja, e po ashtu edhe në organizimin e ndeshjeve miqësore”, ka deklaruar Ejupi.
Në anën tjetër, Jerat është shprehur të jetë i kënaqur që tash e tutje do ta udhëheqë klubin më të famshëm kosovar, i cili shumë shpejt do t’i mbushë 90 vite. Ish trajneri i Kolnit, i Wuppertalerit dhe së fundi i Bonner SC ka pohuar se tashmë ka njohuri rreth futbollit kosovar.
Pasardhësi i Ramiz Krasniqit thotë se objektiv i tij do të jetë ngritja e cilësisë së klubit të tij të ri, i cili shpreson që shumë shpejt do të bëhet i njëjtë sikurse klubet e Bundesligës 2 gjermane për nga kualiteti.
“Kam pa disa ndeshje e disa futbollistë në Kosovë. Futbolli luhet çdo kund me rregulla të njëjta. Në Gjermani themi: ‘Futbolli luhet me 22 lojtarë dhe në fund le të fitojë Gjermania’. Kurse unë po them në fund le të fitojë Prishtina. Shpresoj të mbesim aty ku e la Ramiz Krasniqi. Liga e Kosovës është sikurse liga e katërt gjermane, eventualisht e treta. Ndërsa unë synoj që Prishtina të bëhet si skuadrat e Ligës së dytë gjermane, sepse e meriton, pasi tashmë i mbush 90 vite”, ka deklaruar Jerat.
Sipas tij, vizionet e Remzi Ejupit për të ardhmen e kanë bindur ta pranojë ofertën që kishte marrë nga Prishtina. Mirëpo, ai nuk ka qenë i gatshëm të flasë nëse do të ketë nevojë për ta përforcuar ekipin me lojtarë të huaj apo kosovarë.
56 vjeçari në Gjermani njihet si një trajner i mirë, por kontrovers. Sipas medieve gjermane, Jerat di të vonohet në stërvitje, të flejë në makinë, të mos udhëtojë me autobusin e futbollistëve, por me makinën e tij private, por edhe ta marrë qenin pas vetës edhe gjatë orarit të punës. Këto nuk janë mohuar as nga vetë Jerat, i cili pranoi se te qeni shpesh gjen ngushëllimin kur humb ndonjë ndeshje.
Gjermani në postin e trajnerit do ta zëvendësojë Ramiz Krasniqin, i cili ia doli që stinorin vjeshtor me Prishtinën ta përmbyllë si lider në Superligë. Krasniqi tash e tutje do ta ushtrojë detyrën e drejtorit sportiv. Ai pranoi se ishte mërzitur me faktin që më nuk do ta udhëheqë ekipin bardh e kaltër, të cilën punë e kryente që dy vite. Por, megjithatë, ai tha se vendimet e bordit të klubit duhen respektuar.