Për herë të parë Serbia dhe Kina do të kryejnë stërvitje të përbashkët ushtarake

Kina dhe Serbia do të zhvillojnë këtë muaj stërvitjen e parë të përbashkët ushtarake, duke thelluar bashkëpunimin e tyre në fushën e mbrojtjes.

Sipas Ministrisë kineze të Mbrojtjes, ushtritë e të dy vendeve do të mbajnë stërvitjen “Mbrojtësit e Paqes-2025” në provincën Hebei, në fund të korrikut.

Zëdhënësi Jiang Bin deklaroi se ushtrimet do të përfshijnë njësi të forcave speciale dhe synojnë rritjen e aftësive luftarake dhe forcimin e lidhjeve ushtarake mes dy vendeve.

Kjo është hera e parë që Kina zhvillon një stërvitje ushtarake me një vend evropian që nga bashkëpunimi me Bjellorusinë në vitin 2024.

Serbia, një aleate e ngushtë e Kinës në Evropë, nuk është anëtare e NATO-s dhe ka ruajtur lidhje të forta me Pekinin, veçanërisht pas bombardimeve të NATO-s në 1999.

Gjatë një vizite në Beograd vitin e kaluar, presidenti kinez Xi Jinping e quajti miqësinë me Serbinë një “miqësi të hekurt” dhe vendet ranë dakord për një partneritet strategjik gjithëpërfshirës.

Ende nuk është bërë e ditur nëse një stërvitje e ngjashme do të zhvillohet në territorin serb në të ardhmen.

/rtsh.al/