Petro Koçi homazhe për Fatos Nanon: Patriot, ringriti shtetin pas ’97, por kontribuoi edhe për UÇK-në

Në homazhet për ish-kryeministrin Fatos Nano, Petro Koçi ka përkujtuar kontributin e tij për Shqipërinë dhe rajonin.

Koçi e përshkroi Nanon si një figurë me shpirt socialdemokrat, i përkushtuar për të ringritur vendin pas krizës së vitit 1997 dhe për ta kthyer në një shtet normal dhe qytetar. Ai theksoi intelektin dhe qytetarinë e pakonkurueshme të ish-kryeministrit, duke përmendur edhe përballimin e sfidave politike me Sali Berishën.

“Me shpirt socialdemokrat, Fatos Nano ishte gjithmonë i përkushtuar për zhvillimin e Shqipërisë, duke e nxjerrë nga gjurmët e vitit ’97 dhe duke e kthyer në një qytet normal dhe qytetar. Ishte dhe mbeti një person me intelekt dhe qytetari të pakonkurueshme, i cili përballoi me dinjitet politikën e egër të burgosjes të Sali Berishës”, tha Koçi.

Sipas Koçit, Nano ishte një patriot i madh, i cili jo vetëm që ringriti shtetin pas ’97, por kontribuoi edhe për Ushtrinë Çlirimtare të Kosovës.

“Fatos Nano ishte një patriot i madh, ai jo vetëm që ringriti shtetin e rrënuar në ’97, por i dha edhe shpirt çlirimtar dhe armë Ushtrisë Çlirimtare të Kosovës. Takimi i përfolur me Millosheviçin duhet të shihet si një paradhomë e marrëveshjes së Rambujesë, ishte shembull i diplomacisë dhe kurajës shtetëror, një takim i koordinuar me partnerët tanë gjeopolitikë”, tha Koçi

Homazhet pritet të vazhdojnë gjatë gjithë ditës, me pjesëmarrjen e figurave politike dhe qytetarëve që duan t’i japin lamtumirën e fundit ish-kryeministrit.

/rtsh.al/