Pirlo, 147 prekje me top kundër Catanias

Andrea Pirlo, për tashmë më tepër se një dekadë konsiderohet si një prej organizatorëve më të mirë në Serie A. Pas dhjetë viteve në Milan, ai në fillim të këtij sezoni iu bashkua Juventusit.

Nuk kaloi gjatë dhe Bianconerët filluan të shijojnë magjinë e mesfushorit italian, i cili pavarësisht moshës 32 vjeç, vazhdon të jetë protagonist kryesor në fushën e lojës.

Kushdo që e ka përcjellë Juventusin duke luajtur gjatë këtij sezoni, ka vërejtur se Pirlo është tepër i rëndësishëm në ekipin e Antonio Contes.

Ai e konfirmoi këtë fakt të shtunën mbrëma duke realizuar golin e tij të parë për ekipin në fitoren 3-1 ndaj Catanias.

Por, ajo që bie në sy janë statistikat e tjera. Pirlo në duelin me sicilianët ka pasur 147 kontakte me topin. Prej tyre, Pirlo ka humbur vetëm 26 (më pak se 20 %), statistika të nivelit të lartë.

Përveç golit që realizoi nga goditja e lirë, ai edhe shërbeu në dy golat e tjerë për Giorgio Chiellinin dhe Fabio Quagliarellën.