Plagoset me mjete të forta polici i pyjores

Shkodër- Një punonjës i policisë pyjore është goditur me mjete të forta nga një komshi i tij dhe ka përfunduar me plagë të rënda në spital. Ngjarja ndodhi sot në Shkodër, kur efektivi i policisë, Zef Guri u godit befasisht nga një shtetas, të cilin ai e identifikoi me emrin Gjin Lazri.

Sipas burimeve të policisë lokale, bëhet e ditur se 54-vjeçari ka qenë në një merkatë në lagjen “Partizani”, kur u përball me fqinjin e tij. Pa shkëmbyer asnjë fjalë mes tyre, ai ka nisur ta godasë me mjete të forta në pjesën e kokës dhe pas veshit. I gjendur përballë një situate të tillë, 54-vjeçari ka nxjerrë armën e punës dhe ka qëlluar në ajër për ta trembur. Ka mjaftuar kaq që agresori të largohet, ndërkohë që i dëmtuari është transportuar nga persona të tjerë në spital.

Pas mjekimit, ai ndodhet në gjendje më të stabilizuar, edhe pse plagët e marra kanë qenë të thella. Sipas rrëfimit të tij për policinë, autor ka qenë komshiu i tij, me të cilin kanë pasur konflikte. Ende nuk thuhet asgjë rreth konfliktit që kanë pasur dy shtetasit, ndërkohë që policia mësohet se ka shoqëruar të dyshuarin në komisariat.