Policia arreston 40-vjeçarin që përplasi automjetin në Kryeministri

Policia e Tiranës ka arrestuar shtetasin Eledion Marku, 40 vjeç, pas një incidenti të ndodhur mëngjesin e së dielës pranë godinës së Kryeministrisë.

Sipas të dhënave zyrtare, Marku ka përplasur me automjet shkallët hyrëse të institucionit dhe më pas ka goditur me shkelma derën e godinës, duke shkaktuar ndërhyrjen e menjëhershme të forcave të rendit.

Ndaj tij janë ngritur disa akuza, përfshirë “heqje e paligjshme e lirisë”, “shkatërrim prone”, “prishje e qetësisë publike” dhe “shkelje e rregullave të qarkullimit rrugor”.

Burime pranë hetimit bëjnë me dije se 40-vjeçari dyshohet se ka shfaqur probleme të shëndetit mendor, pasi gjatë marrjes në pyetje nuk ka dhënë shpjegime të qarta mbi motivet e veprimeve të tij.

Gjithashtu, rezulton se automjeti i përdorur në incident nuk ishte në pronësi të tij, por ishte marrë nga një mik i autorit.

Hetimet për rastin po vijojnë për të sqaruar plotësisht rrethanat dhe motivet e ngjarjes.