Pond: S’duhet të ketë dialog special për veriun

Elizabeth Pond nga Qendra për Marrëdhënie Transatlantike - njëherësh autore e librit “Fundloja në Ballkan”, ka deklaruar të martën se nuk duhet të ketë dialog special për veriun e Kosovës.

Ajo ka thënë se Kosova duhet të gjejë vetë zgjidhje për veriun, ndërsa pret nga Bashkimi Evropian që të bëjë presion mbi Serbinë për t’u tërhequr nga kjo pjesë e Kosovës.

“Nëse i shikoni raportet e organizatave joqeveritare për të drejtat e njeriut, kritikat kryesore për Kosovën në çështjet që kanë të bëjnë me minoritetet janë të përqendruara në trajtimin e romëve, ashkalijve dhe egjiptasve, por nuk përmendet trajtimi i serbëve në jug. Serbët e jugut e kanë pranuar, në fakt, atë lloj decentralizimi që e parasheh plani i Ahtisaarit i cili u mundëson atyre të zgjedhin udhëheqësit për komunitetin ku jetojnë”, ka thënë Pond në një intervistë për Radio Evropa e Lirë.

“Pra, ekziston tashmë një bashkëpunim me komunitetin serb në jug. Mund të imagjinoj se pala kosovare, nëse kërkohet dialog i veçantë për veriun, do të kërkonte një sqarim se çfarë do të nënkuptonte ‘autonomi e zgjeruar për veriun’. Ata do të thonë se këtë lloj autonomie ia kanë ofruar të gjithëve - edhe serbëve në jug, por edhe atyre në veri, me Planin e Ahtisaarit.