Presidenti serb Nikoliç arrin marrëveshjen për platformën për Kosovën

Qeveria dhe presidenti serb Tomislav Nikoliç kanë rënë dakord për një platformë për të ardhmen në Bashkimin Europian si dhe për bisedimet me Kosovën. Versioni i parë i platformës i shkruar nga Nikoliç dhe i shpërndarë nga mediat serbe në dhjetor të vitit të kaluar u kritikua nga anëtarët e koalicionit qeverisës, nga opozita por dhe nga perëndimi si shumë nacionaliste. 

"Ka ndryshime por esenca mbetet e njëjtë. Ka pasur zbutje, kështu mund ta përshkruaj. Sigurisht që ka pasur dhe sugjerime që mund të kuptoheshin deri diku si ndërprerje e menjëhershme e bisedimeve, dhe përkufizime të tilla që duhej të hiqeshin dhe janë hequr”. 

Kryeministri serb Ivica Daçiç i cili dhe drejton këto bisedime nga pala serbe, u shpreh se minoriteti serb duhet të ketë institucionet e tij qeverisëse si pjesë e autoriteteve të Kosovës dhe jo të shtetit serb. 

“Me këtë dialogu nuk ka ndaluar dhe as nuk është kufizuar. Ne po vazhdojmë aktivitetet tona, pasi qëllimi është marrja e një date për nisjen e bisedimeve për anëtarësimin në Bashkimin Europian”. 

Ai tha se kjo ishte hera e parë që Beogradi ofronte një zgjidhje. 

Nuk e di nëse njerëzit e kuptojnë se kjo është hera e parë që Beogradi ka ofruar një zgjidhje për institucionet e bllokuara dhe të dyzuara në Kosovë, e cila nuk është njohur si një shtet i pavarur, por që integriteti i saj territorial njihet nga rezoluta 1244 e OKB-së. Kjo është hera e parë që ne po sugjerojmë ekzistencën e një komuniteti serb dhe autonominë e tij, si dhe ekzistencën e autoriteteve të Prishtinës, të cilës ai komunitet i përket. Nëse ky nuk është një lëshim, atëherë unë nuk e di se çfarë nënkuptohet me fjalën lëshim.