Presidentja e Komisionit Evropian bën thirrje për sanksione të reja ndaj Bjellorusisë

Presidentja e Komisionit Evropian, Ursula von der Leyen, bëri thirrje për sanksione të reja kundër Bjellorusisë në përgjigje të përshkallëzimit të krizës së migracionit në kufirin e saj me Poloninë.

“Instrumentalizimi i emigrantëve për qëllime politike nga Bjellorusia është i papranueshëm”, tha Von der Leyen në një deklaratë pas bisedave telefonike me liderët e vendeve të Bashkimit Evropian që kufizohen me Bjellorusinë.

Autoritetet polake dje rritën masat për mbrojtjen e kufirit dhe mobilizuan mbi 12.000 trupa pasi një grup i madh emigrantësh nisën të marshonin nga Bjellorusia drejt Polonisë.

Sipas BE-së, presidenti i Bjellorusisë, Aleksandër Lukashenko, dëshiron të hakmerret kundër sanksioneve të BE-së të vendosura ndaj regjimit të tij duke ftuar “turistët” nga vendet që janë burimet kryesore të migrimit për në BE.

Në deklaratën e saj, Von der Leyen paralajmëroi Minskun zyrtar se “instrumentalizimi cinik i emigrantëve nuk do t’i ndihmojë ata të kenë sukses në qëllimet e tyre” dhe u bëri thirrje vendeve anëtare të BE-së që të miratojnë përfundimisht zgjatjen e sanksioneve ndaj autoriteteve bjelloruse.

“BE-ja në veçanti do të shqyrtojë se si të sanksionojë, duke përfshirë përmes listës së zezë, linjat ajrore të vendeve të treta që janë aktive në trafikimin e qenieve njerëzore”, tha Von der Leyen.

Në muajin gusht, vendet e BE-së në kufi me Bjellorusinë: Lituania, Letonia dhe Polonia, raportuan numër dramatikisht më të madh të kalimeve të parregullta.

Sipas vlerësimeve të fundit nga muaji i kaluar, mbi 6.000 migrantë, kryesisht nga Iraku, Afganistani dhe Siria, u përpoqën të hynin në BE nëpërmjet kufirit Bjellorusi-BE, krahasuar me 150 sa ishte numri vitin e kaluar./AA