Presidentja e PE-së mbërrin në Kiev, riafirmon mbështetjen e Evropës për Ukrainën
Presidentja e Parlamentit Evropian Roberta Metsola mbërriti në Kiev të mërkurën në mëngjes për të riafirmuar “mbështetjen e vazhdueshme dhe të palëkundur” të Evropës për Ukrainën.
Metsola është planifikuar të takohet me Presidentin Volodymyr Zelensky, kryeministren Yulia Svyrydenko dhe kryetarin e Verkhovna Rada Ruslan Stefanchuk, si dhe me udhëheqësit e fraksioneve dhe grupeve të parlamentit ukrainas.
Metsola planifikon të theksojë mbështetjen e Parlamentit Evropian për një “paqe të përhershme, të drejtë dhe të vërtetë”, sanksione më të forta të koordinuara kundër Rusisë, bashkëpunim më të ngushtë parlamentar dhe avancimin e përpjekjes së Ukrainës për anëtarësim në Bashkimin Evropian.
Gjithashtu, pritet të flasë në Verkhovna Rada, parlamentin e Ukrainës, dhe të njoftojë hapjen e përfaqësimit zyrtar të Parlamentit Evropian në Kiev.
Zyra, që do të vendoset së bashku me Delegacionin e Bashkimin Evropian do të sinjalizojë praninë dhe mbështetjen e shtuar të Evropës në terren.
Ndërkaq, më herët presidenti Volodymyr Zelensky ka deklaruar se forcat ruse po përgatiten për dy ofensiva të tjera në shkallë të gjerë pas tre fushatave të dështuara përgjatë këtij viti.
“Ata po përgatiten për dy operacione të tjera ofensive në vjeshtë. Tashmë kishte tre prej tyre, dhe përpara… ka dy fushata të tjera të rënda ofensive”, tha Zelensky në një intervistë me Sky News.
Komentet vijnë pas raportimit të mëparshëm se Presidenti rus Vladimir Putin u tha zyrtarëve amerikanë se synon të pushtojë të gjithë rajonin e Donbasit në Ukrainën lindore deri në fund të vitit 2025.Sipas burimeve të Reuters, Putin beson se forcat e tij po “fitojnë” pavarësisht përparimit të kufizuar.
Që nga nëntori i vitit 2022, Moska ka fituar më pak se 1% të territorit shtesë ukrainas, pavarësisht ofensivës së saj të verës së vitit 2025 që përparon me një nga ritmet më të shpejta që nga fundi i vitit 2024.
“Ata humbën sepse pati një numër të madh viktimash midis personelit dhe një numër të madh pajisjesh të humbura. Ajo që u thashë evropianëve dhe ajo që thashë në Shtëpinë e Bardhë… rusët nuk do të jenë në gjendje të marrin pjesën lindore”, tha Zelensky.
/rtsh.al/