Programe të reja në universitet! “Aleksandër Moisiu” në Durrës synon të afrojë edhe studentë të huaj

Universiteti “Aleksandër Mosiu” në Durrës vazhdon të sjellë risi duke synuar që programet e studimit që ai ofron të pranohen jo vetëm nga studentë shqiptarë, por edhe të huaj.

Për vitin e ri akademik ky universitet ka miratuar 6 programe duale të reja studimi falë marrëveshjeve që janë nënshkruar me universitetet e La Sapienca, Tor Vergata dhe Xhenovës në Itali, Kot d’Azyr në Francë, Bregançes në Portugali, Krakovi në Poloni dhe universiteti i Nitrës në Sllovaki.

“Këto marrëveshje që kemi realizuar do ta bëjnë ofertën më të pasur, si për studentët shqiptarë, ashtu edhe ata të huaj”, tha Shkëlqim Fortuzi, rektor i UAMD.

Këtë vit kanë dalë studentët e parë shqiptarë që përfunduan studimet Master në La Sapienza në “Zhvillim ekonomik”, të cilët janë pajisur njëkohësisht edhe me diplomën e universitetit “Aleksandër Moisiu”.

Rektori Fortuzi shton se disa programe duale do të jenë në anglisht këtë vit.

Në çeljen e vitit të ri akademik 2025-2026 pritet të inaugurohet edhe godina e re e kampusit për fakultetin e Studimeve Profesionale, e cila do të jetë e pajisur me të gjithë laboratorët e domosdoshëm.

/vizionplus.tv