Prokuroria në Bashki, sekuestrim dokumentave për sheshin Skënderbej

Flamur Vezaj
TIRANË- Hetuesit e Task-forcës së prokurorisë së Tiranës, pritet që gjatë javës që po vjen të zbarkojnë në zyrat e Bashkisë së kryeqytetit, konkretisht në zyrat juridike dhe të prokurimeve të këtij institucioni, për të sekuestruar materialet shkresore në lidhje me ndërtimin e sheshit Skëndërbej. Lajmi konfirmohet nga burimet zyrtare të organit qendror të akuzës, sipas të cilave, është lëshuar vendimi për sekuestrimin e të gjitha materialeve shkresore që ka të bëj me rikonstruktimin e sheshit Skëndërbej si dhe ndryshimin e projektit të punimeve në këtë shesh.

Është kërkuar nga Bashkia e Tiranës, që të vërë në dispozicion të hetimit të gjitha materialet shkresore që kanë të bëjnë me rikonstruktimin e sheshit Skënderbej, të cilat do ti nënshtrohen një hetimi për arsyen e ndryshimit të projektit të punimeve në këtë shesh. Do të sekuestrohet vendimi i Këshillit Bashkiak i marr në kohën e drejtimit të Bashkisë nga kreu u opozitës z.Edi Rama si dhe të gjitha materialet e firmosura për rikonstruktimin e këtij sheshi pas ardhjes në detyrë të z.Lulëzim Basha. Do të verifikohen procedurat e ndjekura dhe fondet e shpenzuara për ndryshimin e projektit të këtij sheshi-thuhet nga këto burime.

Sipas tyre, pritet edhe marrja në pyetje e të gjithë këshilltarëve të opozitës në Këshillin Bashkiak të cilët janë edhe firmëtarë të kallëzimit të bërë ndaj zyrtarëve të Bashkisë së Tiranës për ndryshimin e projektit të punimeve në sheshin Skëndërbej. Në kallëzim, theksohet gjithashtu se duke filluar nga faza e projektimit dhe në vijim të zbatimit të fazës së parë të projektit, janë investuar rreth 5 milionë euro të cilat tashmë janë varrosur poshtë betonit të hedhur për shtrimin e rrugës. Hetimet kanë nisur për akuzën e shpërdorimit të detyrës duke i shkaktuar shtetit një dëm të konsiderueshëm, çka do të shtyjë hetuesit për të kryer edhe një ekspertizë të punimeve për të konstatuar edhe dëmin financiar.