Protesta e opozitës më 8 maj, Policia e Tiranës njofton planin e masave dhe akset rrugore që do të bllokohen
Drejtoria Vendore e Policisë Tiranë ka hartuar një plan të detajuar masash për garantimin e rendit dhe sigurisë publike gjatë tubimit të paralajmëruar nga Partia Demokratike. Tubimi është parashikuar të mbahet të premten, më datë 8 maj, në orën 19:00, përpara godinës së Kryeministrisë në bulevardin “Dëshmorët e Kombit”.
Për të siguruar mbarëvajtjen e aktivitetit dhe sigurinë e pjesëmarrësve, autoritetet policore kanë njoftuar kufizime të lëvizjes në disa prej akseve kryesore të kryeqytetit, duke nisur nga mesnata e sotme.
Nga ora 23:45 (07.05.2026) do të bllokohet lëvizja dhe do të ndalohet rreptësisht parkimi i automjeteve në bulevardin “Dëshmorët e Kombit”, konkretisht në segmentin nga “Ura e Dajtit” deri te rruga “Ismail Qemali”.
Nga ora 15:00 (08.05.2026) harta e bllokimit do të zgjerohet në të gjithë gjatësinë e bulevardit “Dëshmorët e Kombit”, nga kryqëzimi pranë Ministrisë së Brendshme deri te sheshi “Nënë Tereza”. Gjithashtu, qarkullimi do të pezullohet në rrugët: “Ukraina e Lirë”, “Papa Gjon Pali II” dhe “Ismail Qemali”.
Apeli i Policisë, mirëkuptim dhe distancim nga dhuna
Në njoftimin zyrtar, Policia e Shtetit u bën thirrje organizatorëve dhe qytetarëve që të respektojnë kornizat ligjore të tubimit.
“Policia e Tiranës apelon për organizatorët e tubimit për respektimin e afatit kohor dhe vendit ku do të zhvillohet tubimi, si dhe kërkon mirëkuptimin e qytetarëve për kufizimin e lëvizjes me automjete,” thuhet në deklaratën e shpërndarë për mediat.
Më tej, autoritetet kanë kërkuar vëmendjen e pjesëmarrësve për të ruajtur qetësinë dhe për të shmangur çdo incident që mund të cenojë sigurinë publike.
“Apelojmë që qytetarët të distancohen në rast se gjenden përballë veprimeve të kundërligjshme që cenojnë rendin dhe sigurinë publike,” nënvizon Drejtoria Vendore e Policisë.
Strukturat e rendit do të jenë prezente në terren deri në përfundimin e plotë të tubimit për të siguruar rrjedhshmërinë e lëvizjes në rrugët alternative dhe mbrojtjen e institucioneve shtetërore.
/rtsh.al/