Protesta kombëtare, policia e Dibrës lë të “lirë” protestuesit për Tiranë, asnjë kontroll në Rrugën e Arbrit

Ndryshe nga e shtuna e kaluar, ku policia blindoi rrugën e Arbrit me kontrolle për të gjithë ata që udhëtonin nga Qarku Dibër në drejtim të Tiranës ku mbahej protesta e studentëve dhe opozitës, ditën e sotme nuk ka patur asnjë postobllok të uniformave blu.

Rruga e Arbrit pranë tunelit të Murrizit ku ishte dhe pika e kontrollit nuk pati postobllok policie.

Po ashtu as në rrugët e tjera nuk ka patur kontrolle në aksin Burrel – Milot apo Burrel – Klos.

Blutë e Dibrës nuk janë përqendruar në rrugë për të monitoruar ata që do t’i bashkohen protestës së thirrur në orën 12:00, por disa furgona me polic nga Drejtoria Vendore e Policisë Dibër janë dërguar si mbështetje për forcat e Tiranës.

Ashtu si javën e kaluar edhe sot protestuesit nga qarku Dibër kanë lëvizur me automjete private dhe jo në mënyrë të organizuar për të mos patur probleme me policinë.