“Pse më ke zënë rrugën, duhet të kaloj unë i pari!”, detaje nga sherri mes adoleshentëve. 13-vjeçari ende në arrati

“Pse më ke zënë rrugën, duhet të kaloj unë i pari!”. Ishte kjo fjalia e cila duket se ndezi konfliktin mes dy të miturve në shkollën private 9-vjeçare ‘Dea 2001’, në lagjen nr.3, Sarandë, mëngjesin e kësaj të mërkure, ende para nisjes së procesit mësimor.

Burimet bëjnë me dije se 13-vjeçari S.G, i njohur si problematik dhe me sjellje të paqëndrueshme në shkollë, u përfshi fillimisht në një debat verbal me 15-vjeçarin R.H. Grindja nisi për një arsye të thjeshtë: të dy nxënësit nuk ranë dakord se kush duhet të kalonte i pari në oborr.

Situata agravoi shpejt. Sipas burimeve, S.G nxori një mjet prerës (thikë që e mbante me vete) dhe goditi R.H në pjesën e qafës, duke shkaktuar një plagë serioze. I plagosuri mori menjëherë trajtim mjekësor në spital, dhe fatmirësisht pas trajtimit u largua nga ambientet spitalore. Ndërkohë, 13-vjeçari u largua menjëherë nga shkolla, duke e lënë situatën të tensionuar dhe duke alarmuar stafin dhe nxënësit e tjerë.

Burimet pranë ngjarjes bëjnë me dije se 13-vjeçari ka pasur më parë probleme disiplinore dhe sjellje problematike, ç’ka ka bërë që stafi i shkollës të jetë gjithmonë i vëmendshëm ndaj tij. Incidenti ka ngritur shqetësime të mëdha për sigurinë në ambientet shkollore dhe për menaxhimin e rasteve të dhunës mes nxënësve.

Policia ka nisur hetimet për zbardhjen e plotë të rrethanave dhe po punon intensivisht për kapjen e 13-vjeçarit.