Qeveria: I merret toka kujt s'e punon

Qeveria po përgatit një projekt-ligj, i cili parashikon sanksione për të gjithë pronarët e tokave që i kanë lënë ato djerrë. Ligji, i cili do të hartohet brenda këtij muaji nga ekspertët e Ministrisë së Bujqësisë dhe do të shkojë për miratim në qeveri. Efektet e tij do të shtrihen tek të gjithë fermerët që kanë përfituar toka nga ligji 7501.

Kjo u bë publike dje nga kryeministri Berisha gjatë mbledhjes së qeverisë. Sipas tij, shteti do të mbajë qëndrim ndaj tokës së papunuar dhe se ajo është një dëm i rëndë i interesit publik për vendin.

Kryeministri tha se Shqipëria është një vend me pak tokë, pasi zonat malore zënë 2/3 e territorit. Kreu i ekzekutivit tha se megjithëse ka zona të mbjella në çdo centimetër katrorë, në shumë të tjera në ultësirën bregdetare dhe jo vetëm aty, ka mijëra hektarë që nuk punohen.

"Këtë tokë e kemi ndarë me ligjin 7501, një ligj që është bazuar në parimin 'toka atij që e punon' dhe 'atij që jeton aty'. Unë nuk them se do t'i marrim tokën atij që ia kemi dhënë me ligj e do t'ia japin dikujt tjetër, por kjo tokë do të kalojë në fondin e komunës dhe mbi bazën e ligjit do të jetë i detyruar ta japë me të dhjetë."- tha kryeministri.

Sipas tij, duke kaluar në fondin e komunës, kjo e fundit do të ketë të drejtë t'ia japë dikujt tjetër për ta shfrytëzuar dhe pronarit, që i ka kthyer shpinën tokës, t'i paguajë të dhjetën, pasi nuk mund të lihet as edhe një metër katror tokë të papunuar në vend.

"Ligji do të përcaktojë të gjitha procedurat e dhënies me të dhjetë të tokës, të cilat do të jenë transparente, jo me letra xhepi, por me opsion të hapur dhe me projekte.

E përsëris kemi shumë pak tokë. Mbi gjysmë milioni qytetarë shqiptarë jetojnë me një sipërfaqe toke për frymë jashtëzakonisht të papërfillshme. Nëse shkoni në Kurvelesh apo Mirditë do të shihni sesa tokë për frymë ka. Ndërkohë që ka fusha të tëra që rrinë djerrë. Kjo do të marrë fund",- tha Berisha.

Ai e konsideroi mëkat lënien e tokës djerrë në ultësirën perëndimore. "Ndërkohë që, nëse shikoni në kodrat midis Peqinit dhe Kavajës, do të mahniteni, sesi në majë të saj kanë punuar një parcelë edhe pse në dimensione jo të mëdha.

Po ashtu në Kuç, Progonat jetojnë me mikroparcela, në një kohë kur qindra e mijëra hektarë tokë rrinë të papunuara". Ai tha se qeveria do të bëjë çdo përpjekje për të luftuar varfërinë dhe varfëria më ekstreme sot është në zonat malore.

Projekti

Kalimi i tokës nga pronari tek ai që do ta punojë, duket i vështirë të gjejë zbatim. Disa fermerë shprehen skeptikë për metodën e gjetur për nxitjen e punimit të tokave në vend. Sipas tyre, kalimi i tokës në fondin e komunës dhe mënyrat e përzgjedhjes të kandidatëve për punimin e saj mund të sjellë konflikte mes palëve.

Ndërsa specialistët e bujqësisë thonë se një metodë për nxitjen e punimit mund të jetë taksimi i tokave djerrë. Në shumë zona të Shqipërisë, pronarët, që në disa raste kanë emigruar jashtë vendit, i lëshojnë tokat e tyre me qira.

Kjo mënyrë cilësohet nga ata një element që duhet shfrytëzuar nga shteti për të zbatuar një projekt më efektiv, sesa kalimi i pronës në fond komunar dhe dhënia për punim tek një tjetër nëpërmjet zyrtarëve lokalë.

Liberalizohet shit-blerja e tokës

Qytetarët me origjinë shqiptare do të kenë mundësi të blejnë toka në Shqipëri. Një ligj që pritet të miratohet brenda gushtit parashikon shitjen e tokës në të gjitha format, për të gjithë qytetarët me origjinë shqiptare. Aktualisht, toka në Shqipëri shitet për truall, por jo për qëllime të tjera.

Projekti u bë i njohur dje në mbledhjen e qeverisë, ku kryeministri Berisha tha se për të gjithë shtetasit e huaj me origjinë shqiptare do të përdoren si kombësia ashtu edhe origjina, sepse ka vende të cilat njësojnë kombësinë me shtetësinë dhe kjo i përjashton.

"Ndaj duhet që ligji të përgatitet me kujdesin më të madh, në mënyrë që çdo shtetas që ka nënën ose babanë shqiptar, që ka origjinë shqiptare, do të kërkoja që të mos ndiqnim vetëm linjën nga babai, por të pranojmë edhe atë të nënës, të kenë të drejtë të blejnë tokë në Shqipëri",- tha Berisha.

Ai theksoi se kjo prerogativë, brenda një kohe jo të largët, është e detyrueshme për t'u shtrirë për të gjithë shtetasit e vendeve anëtare të Bashkimit Europian. Në ligj do të parashikohet që procedura do të jetë identike si për qytetarët me shtetësi shqiptare dhe se nuk do të ketë asnjë procedurë shtesë.

TIRANË- Kryeministri Sali Berisha ka deklaruar sot se do të hartohet një ligj i ri për tokat e papunuara në vend, të cilat do t'i kalojnë komunës, ndërkohë që pronari do të marrë një të dhjetën e fitimit nga shfrytëzimi i saj.
Deklarata është bërë gjatë mbledhjes së qeverisë, ku sipas Berishës, ligji i ri do të përcaktojë qëndrimin e shtetit ndaj tokës së papunuar, e cila është një dëm i rëndë i interesit publik për këtë vend.
Berisha e konsideroi këtë çështje si mjaft të rëndësishme për një vend si Shqipëria e cila realisht ka shumë pak tokë të punueshme. "Shqipëria është një vend malor ku rreth 2/3 e territorit kanë probleme shumë të mëdha në këtë drejtim. Në këto zona mbillet çdo metër katror tokë, madje edhe mikroparcela, ndërsa në zona të tjera të ultësirës bregdetare, dhe jo vetëm, ka mijëra hektarë të cilat nuk punohen", tha Kryeministri Berisha.
Sipas tij, "kjo tokë është ndarë me ligjin 7501, ligj i cili është bazuar me parimin: toka i shkon atij që e punon dhe që jeton aty".
Ai sqaroi se ligji i ri që do të hartohet "nuk synon që t'ia marri pronësinë e tokës pronarit të ligjshëm, por parashikon që kjo tokë të kalojë në fondin e komunës e cila do të jetë e detyruar ta japë atë me taksën e të 10-ës".
"Taksa e të 10-ës, është taksa e librave të shenjta, taksa më e lashtë e të gjitha kohërave, më e drejta dhe më e ndershmja", tha Kryeministri ,duke sqaruar se në këtë rast "toka do të kalojë në fondin e komunës, e cila do të ketë të drejtë t'ia japë dikujt tjetër për ta shfrytëzuar dhe pronarit që ia ka kthyer shpinën tokës t'i paguajë të 10-at".
"Nuk do të lemë as edhe një metër tokë të papunuar në këtë vend. Të gjitha procedurat e dhënies së tokës me taksën e të 10-ave duhet të jenë transparente dhe nuk duhet të jenë me letra xhepi", tha Kryeministri Berisha.
Sipas tij , "në Shqipëri, mbi një gjysmë milioni qytetarë jetojnë me një sipërfaqe toke për frymë, jashtëzakonisht të papërfillshme, në një kohë kur në ultësirën bregdetare ka sipërfaqe të tëra toke të papunuara".
"Kjo qeveri do të bëjë çdo përpjekje për të luftuar varfërinë", tha Kryeministri duke shtuar se "varfëria më ekstreme sot është në zonat malore.