Qeveria miraton vendimin: Festat e fundvitit, 20 mijë lekë shpërblim 560 mijë pensionistëve

Kryeministri Sali Berisha flet në mbledhjen e qeverisë për rritjen e pagave dhe pensioneve

UPDATE- Kreu i qeversië Sali Berisha deklaroi sot se mbetet i vendosur për të vënë në jetë të gjitha premtimet. Vendimi për rritjen e pagave dhe e pensioneve, si dhe shpërblimi i fundvitit për pensionistët dhe administratën, ishin në fokus të mbledhjes së sotme të  Këshillit të Ministrave. Në fjalën e tij, kryeministri Berisha theksoi se e 560 mijë pensionistët do t’u jepet 20 mijë lekë shpërblim, për festat e fundvitit. Në këtë drejtim, kryeministri hodhi poshtë edhe pretendimet e opozitës, të cilët sipas tij, ushtruan një trysni të egër lidhur me shpërblimin e qeverisë. “Të nderuar pensionistë, të cilët përjetuat një trysni të pamerituar për të mos thënë të pashpirtë mëdiatike të qëllimtë lidhur me shpërblimin e fundvitit. Qeveria nuk ka pas ndërmend të përjashtojë shpërblimin. 560 mijë nëna e baballarë në pensione, kanë konsideratën më të madhe nga kjo qeveri kanë dhimbshuri dhe respekt ndaj tyre, vlerësimin për kontributin e tyre në ndërtimin e vendit, që sot është krejtësisht tjetër falë mundit të tyre dhe më duhet të denoncoj publikisht mediat e kontrolluara nga opozita, që disinformuan në mënyrë të pandershme pensionistët, shkuan deri aty sa të përgjysmojnë e t’i përdorin për qëllimet dezinformuese deklaratat e ministrit të Financave e krijuar shqetësim të pabazë tek pensionistët. Ndaj sot ne vendosim për shpërblimet e punonjësve të adminsitratës me shumën e përcaktuar nga Ministria e Financave dhe shpërblimin e pensionistëve me 20 mijë lekë”- u shpreh Berisha. Po në këtë linjë, shefi i ekzekutivit siguroi pensionistët se asgjë nuk mund të lëkundë vendosmërinë e kësaj mazhoranca për mbështetjen e tyre. “Rikujtoj këtu se në fillim të vitit 2006, pensioni mesatar në fshat ishte 34 dollarë, sot është rritur me 110% dhe çdo vit opozita ka kërkuar dhe ka votuar kundër rritjes së pagave dhe pensioneve dhe nuk sollën një amendament për rritjen. Çfarë amendamenti sollën? Në Gines regjistrohet amendamenti i tyre, si gafë e përmasave ndërkombëtare, të llogaritet borxhi si përqindje e PBB”- theksoi ai. Berisha kërkoi nga opozita që të paktën të kërkojnë falje për troditjen psikologjike që u sollën pensionistëve me lajmet e tyre dizinformuese.  “Ndaj ftoj opozitën që nuk votoi për rritjen e rrogave e pensioneve, që nuk kërkoi shpërblimin e pensionistëve, të kërkojë ndjesë publikisht, se dhe ndjesa është dhunti e njeriut të qytetëruar. Uroj që të kërkojnë ndjesë, se nuk votuan në parlament për rrogat e pensionet, se përhapën dezinformime të pandershme, që kërcënonin psikologjikisht pensionistët, ndërkohë që ata do shpërbleheshin. Kjo qeveri është ndër më të paktat që t’i dërgojë këtë kartolinë pensionistëve dhe administratës”, deklaroi kryeministri.