Qeveria ndërron strategjinë e financimit të borxhit

Në tremujorin e tretë janë emetuar vetëm obligacione 2-vjeçare, dhe rritja e portofolit të letrave me vlerë të qeverisë të sistemit bankar është bërë me investime në këtë instrument. Banka e Shqipërisë shpjegon se, qeveria e ka parë të arsyeshme financimin e deficitit me borxh afatgjatë, duke shfrytëzuar likuiditetin e bollshëm të sistemit bankar. Interesi për obligacionet 2-vjeçare është rritur në 8.84%. Në këtë nivel, interesi konkurron edhe interesin e eurobondit të marrë në tregun e huaj këtë vit nga qeveria, interesi i të cilit ishte 7.5 për qind në monedhën euro në momentin e emetimit dhe tani po tregtohen nga bankat që e kanë blerë me humbje me një interes mbi 12 për qind. Ulja e interesit të bonove të thesarit ndikon në mënyrë të drejtpërdrejtë në uljen e interesave të kredive në lekë. Kur normat e interesit ulen, huamarrja bëhet më atraktive. Kur në tregun bankar ekzistojnë norma të ulëta interesi, konsumatorët e kanë më të lehtë të blejnë një makinë apo një shtëpi. Blerja e një shtëpie rrit kërkesën për mallra të tjerë si mobilie, pajisje elektrike, duke i dhënë kështu një shtysë rritjes ekonomike. Për më tepër, konsumatorët shpenzojnë më pak në kostot e interesit, duke u dhënë mundësi atyre të kenë më shumë para për të shpenzuar në mallra dhe shërbime. Qeveria merr hua nga publiku dhe siguron të ardhurat e nevojshme, për të financuar borxhin e saj të brendshëm. Huamarrja nga publiku ndryshe do të kuptohej si shitja e letrave me vlerë të qeverisë, publikut. Aktualisht, qeveria shqiptare emeton dy lloje letrash me vlerë: bono thesari dhe obligacione. Bonot e thesarit tregtohen për periudha 3, 6 dhe 12-mujore, ndërsa obligacionet kanë periudha maturimi më të gjata 2-, 3- dhe 5-vjeçare. Si për çdo borxh të kërkuar, për të cilin paguhen interesa, edhe qeveria paguan interesa për këtë borxh. Por, ajo kërkon që këto interesa të jenë sa më të ulëta.