Rama- Wahlund: Suedia mbështet integrimin e vendit

Sot pasdite, kreu socialist Edi Rama u takua me ambasadorin suedez zotin, Lars Wahlund. Në takim u diskutua mbi situatën politike dhe ekonomike në Shqipëri. Kryetari Rama e njohu ambasadorin me kursin e ri politik të ndjekur nga Partia Socialiste dhe i parashtroi atij propozimet që ka bërë PS-ja, për reformën parlamentare dhe reformën zgjedhore, si dy prej reformave kryesore në procesin e kandidimit të Shqipërisë në Bashkimin Europian.
 

Ambasadori përgëzoi kryetarin e PS-së, për kursin e ri politik, duke e konsideruar atë si ushtrim përgjegjësie në funksion të interesave kombëtare. Ambasadori i Suedisë, në këtë takim siguroi kreun socialist, se Suedia do të vazhdojë të mbështesë edhe në të ardhmen përmes programeve të bashkëpunimit, integrimin europian të Shqipërisë në BE.