Rama ftesë Berishës: Të takohemi për presidentin e ri

Kryetari i Partisë Socialiste Edi Rama i ka bërë sot ftesë publike kryeministrit Sali Berisha për t`u takuar në mënyrë që të bisedojnë për zgjidhjen e një presidenti konsensual.

Në letrën e tij drejtuar kryeministrit, kryesocialisti Rama thekson ky takim do të bëjë të mundur hapjen e një dialogu kontruktiv në lidhje me zgjedhjen e presidentit të ri ndërsa shton se mbetet në pritje të një përgjigjeje për këtë kërkesë dhe është i gatshëm ta takoj pa humbur kohë.

“Në emër të Partisë Socialiste dhe të gjithë asaj mase të madhe qytetarësh shqiptarë që Partia Socialiste përfaqëson në Kuvend, dëshiroj t`Ju ftoj me anë të kësaj letre që të takohemi drejtpërsëdrejtë, për të këmbyer pikëpamjet tona dhe për të tentuar të hapim një dialo kontruktiv mes të gjitha palëve lidhur me rëndësinë madhore të ndërtimit të një procesi të dobishëm për vendin në zgjedhjen e presidentit të ri të Republikës” thekson Rama.

Letra është gjithashtu edhe për dijeninë e kryetarëve të partive të tjera parlamentare si kryetarit të LSI-së Ilir Meta, kryetarit të PDIU-së Shpëtim Idrizit, kryetarit të PR-së Fatmir Mediut, kryetarit të PBDNJ-it Vangjel Dule, përfshirë edhe formacionin më të ri politik, Frymën e Re Demokratike, e cila ka si kryetar të grupit nismëtar Gazmend Oketën.

Ja letra e plotë e kryesocialistit Rama drejtuar kryeministrit Berisha:

 Ju shkruaj për të ndarë me ju, drejtëpërdrejt po edhe publikisht, bindjen se në frymën e Kushtetutës së Shqipërisë proçesi i zgjedhjes së Presidentit të ri të Republikës është shumë më shumë se sa një proçedurë parlamentare e radhës. Për më tepër në kontekstin e sotëm historik të Shqipërisë, që për të tretin vit radhazi synon të ngjitet në shkallën e kandidatit për Bashkimin Europian, kjo zgjedhje kërkon një vlerësim dhe vëmendje të veçantë.

Shqiptarët pa dallim presin një përgjigje pozitive nga Komisioni Europian për aplikimin për statusin e kandidatit. Po edhe miqtë e partnerët tanë europianë dhe Shtetet e Bashkuara po njësoj, si mbështetës të palëkundur të vendit tonë në rrugën e integrimit, nuk e dëshirojnë që aplikimi i Shqipërisë të refuzohet për të tretën herë këtë vjeshtë. Ata së bashku kanë bërë dhe po bëjnë gjithçka munden që kjo të mos ndodhë.

Mirëpo, padyshim, në radhë të parë jemi vetë ne përfaqësuesit politikë të shqiptarëve që duhet të bëjmë gjithçka mundemi që Komisioni Europian të na mbështesë në ngjitjen e shkallës së parafundit për integrimin e plotë në Bashkimin Europian.

Nuk mund të vihet në diskutim se proçesi i zgjedhjes së Presidentit të ri të Republikës është një provim shumë i rëndësishëm për Shqipërinë drejt momentit kyç të vjeshtës së ardhshme, që përkon edhe me 100 vjetorin e shtetit shqiptar. Pesha e madhe simbolike e 100 vjetorit i jep një rëndësi ende më të veçantë edhe proçesit të nevojshëm politik që duhet të rezultojë me zgjedhjen për President të një figure e cila në frymën e Kushtetutës sonë simbolizon unitetin kombëtar.

Unë besoj se simbolika e 100 vjetorit të pavarësisë e forcon kontekstin historik të përpjekjeve për integrimin e vendit tonë në Bashkimin Europian dhe, në njëfarë mënyre, e bën më të madhe peshën e suksesit apo disfatës së politikës shqiptare në këtë vit jubilar, e në këtë rast konkret të zgjedhjes së Presidentit gjithashtu.

Me po kaq rëndësi besoj gjithashtu se është edhe për qytetarët shqiptarë, që në fund të një proçesi të mundshëm gjithpërfshirës mes gjithë palëve parlamentare për zgjedhjen e kreut të shtetit, të kenë në krye të shtetit një President garant të Kushtetutës dhe të institucioneve apo të proçeseve kushtetuese që lidhen me kreun e shtetit, e jo një noter partiak të një pale të vetme.

Prandaj, në emër të Partisë Socialiste dhe të të gjithë asaj mase të madhe qytetarësh shqiptarë që Partia Socialiste përfaqëson në Kuvend, dëshiroj t`Ju ftoj me anë të kësaj letre që të takohemi drejtëpërdrejtë, për të këmbyer pikëpamjet tona dhe për të tentuar të hapim një dialog konstruktiv mes të gjitha palëve lidhur me rëndësinë madhore të ndërtimit të një proçesi të dobishëm për vendin në zgjedhjen e Presidentit të ri të Republikës.

Mbetem në pritje të njëpërgjigjeje nga ana Juaj për këtë kërkesë dhe jam i gatshëm t`Ju takoj pa humbur kohë