Rama i pranishëm në funeralin e Silvio Berlusconit: Manifestoi një respekt të posaçëm për shqiptarët
Kryeministri Edi Rama ishte i pranishëm në funeralin e ish-kryeministrit Italian Silvio Berlusconi.
Në një postim në rrjetin e tij Facebook, Rama ka publikuar pamje nga ceremonia e funeralit shtetëror të zhvilluar për ish-kryeministrin italian Silvio Berlusconi e cila u mbajt në Katedralen e Milanos.
Bashkangjitur Rama vlerëson ish kryemnistrin më jetëgjatë në detyrë në historinë e Italisë si një njeri që manifestoi në të gjitha rastet një afeksion e një respekt të posaçëm për shqiptarët.
“Sot në lamtumirën e një personazhi që e jetoi jetën si një rrotullim i plotë i tokës rreth diellit, me të tëra shkallët e dritës dhe errësirës, duke prekur majat në botën e biznesit, spektaklit e sportit dhe duke e kthyer edhe politikën në një spektakël me në qendër vetveten.
Një njeri që e deshi jetën me gjithsej, e jetoi me të gjitha ekzagjerimet e mundshme, e mishëroi me të gjitha dimensionet e qenies së tij të shumëfishtë, jetësim kulmor i shprehjes, “Edhe ëngjëlli edhe djalli rrinë bashkë tek i gjalli.
Si kryeministri më jetëgjatë në detyrë në historinë e Italisë, Silvio Berluskoni manifestoi në të gjitha rastet një afeksion e një respekt të posaçëm për shqiptarët”, shkruan Rama.
Silvio Berlusconi ndërroi jetë dy ditë më parë në moshën 86-vjeçare.
Në Itali është Ditë Zie Kombëtare dhe Kuvendi atje ka ndërprerë punën për një javë.
/rtsh.al/