Rama paralajmëron masa drastike ligjore për ata që hedhin plehra në rrugë

Kryeministri Edi Rama ka paralajmëruar dënime drastike për të gjithë ata që nuk respektojnë rregullat për hedhjen e mbeturinave.

Shefi i qeverisë ka postuar në rrjetet sociale foto të rrugës se re Kardhiq-Delvinë, pjese të së cilës janë shndërruar në vend depozitime plehrash, duke paralajmëruar se kjo situatë do të rregullohet me ligj dhe nga viti i ardhshëm çdo qytetar apo biznes do të dënohet për hedhjen e mbeturinave buze rruge apo  jashtë koshave te përcaktuar.

EDI RAMA

“Ne s’do të lejojmë që sjellja e egër e një pakice individësh të pacipë, të dëmtojë Shqipërinë e rilindur turistike! Një paketë e re ndëshkimesh drastike ligjore për hedhësit e plehrave rrugëve, do të hyjë në fuqi maksimumi fillimvitin e ardhshëm.”

Shqipëria këtë vit po përballet me një bum turistik. Pastërtia e rrugëve, plazheve dhe qyteteve është një prej kërkesave kryesore që shefi i qeverisë Rama u ka adresuar bashkive në prag të sezonit turistik.

Prej ardhjes në pushtet të socialistëve aksionet për pastrimin e zonave turistike kanë qenë të shpeshta, duke përfshirë në disa raste edhe forcat e ushtrisë për të garantuar një mjedis të pastër veçanërisht për të gjithë ata që zgjedhin Shqipërinë për të pushuar.