Rama, shoku i autobusit që s’kupton nga punët shtetërore

Partia Demokratike zhvillon Konventën për Shqipërinë e Zhvilluar. Vazhdimi i investimeve, apeli kryesor i mazhorancës, për një mandat të ri në qeverisje.
Berisha: “Me PD marrim statusin dhe integrojmë Shqipërinë në Europë
Ligjëratat e djeshme/“Kur Rama të votojë 3 ligjet, ne nuk do ia falim - daullet e humbjes do bien për të”

Kryeministri Berisha premtoi se në katër vitet e ardhshme do të tërheqë investitorët më të fuqishëm të huaj. “Me politikat fiskale do bëjmë Shqipërinë vendin më tërheqës për investitorët e huaj në rajon dhe më gjerë. Në katër vitet që vijnë do sjellim në Shqipëri gjigantët e hi-tech dhe të prodhimit të automobilave me politikën fiskale për 5 vjet zero taksa”- u shpreh kryeministri 

Partia Demokratike zhvilloi dje konventën për Shqipërinë e Zhvilluar në Pallatin e Kongreseve në Tiranë, ku shpalosi programin e saj me të cilin kërkon një mandat të tretë qeverisës. Konventa e PD-së, u çel nga numri dy i PD-së, Astrit Patozi, i cili duke sjellë në vëmendje arritjet e mazhorancës ndër vite, theksoi se PD nuk do të ndalet deri sa Shqipëria të bëhet anëtare me të drejta të barabarta ne BE. Ndërsa kryetari i PD dhe njëherazi kryeministri Sali Berisha u shpreh se në 8 vite në Shqipëri janë ndërtuar mbi 11 mijë km rrugë në të katër anët e Shqipërisë. “Në ndërtuam në pak kohë mbi 11 mijë km rrugë në kaur anët e Shqipërisë. Ti shok në autobus, duhet të të them dy fjalë, në Shkodër u the shkodranëve se janë ndërtuar gjithsej 600 km, por kur Shkodra qeshi dhe u tall me ty dhe t’u përgjigj se nga ura e Drinit në Fierze dhe gjer në Velipojë nga Vermoshi gjer ne Pukë, janë ndërtuar mbi 900 km rrugë. Nga autobusi yt, shpike shifrën tjetër, 1 500 km rrugë, mjeran, mjeran, i shkretë, i padijshëm, asgjë nga punët shtetërore. Ke qenë kryetar bashkie, o piktor i dështuar. E ke lenë qytetin tonë me 250 km rrugë dhe rrugica të pa asfaltuara. Mësoje këtu njeri i shkret, i varfër i mjerë në ide, se çdo rrugë ndërtohet me një projekt, se ajo rrugë ndërtohet mbi një preventiv, se çdo preventiv zbatohet me një financim dhe se o shoku i autobusit vetëm Fondi Shqiptar i Zhvillimit me 320 milion dollarë ka ndërtuar kilometër për kilometër 1520 km rrugë. Mësoje, mësoje o piktor i dështuar se Fondi Shqiptar i Rajoneve dhe grantet konkurruese gjatë viteve të qeverisë sonë kanë marrë për rrugë shkolla she ujësjellësa, 1 miliard e 50 milion dollarë. Ti je nga ata që ke marrë jo pak, por i bëre rroga dhe rrush e kumbulla me Koçon dhe le Tiranën pa rrugë. Mësohet se financat janë financa, se shifrat e financave janë të qarta dhe të sakta si rrezja e diellit, se ato nuk lëvizin me çantat e Koços apo valixhet e Fidelit po lëvizin nga thesari ne banken e shteti. Mësoje se Shqipëria ka një Drejtori Rrugësh dhe Ministri që ka investuar në rrugë 10 herë më shumë se Fondi Shqiptar i Zhvillimit. Duke parë se je i sëmurë nga rrugët, unë jam mjek e kam të thjeshtë ta kuptoj se të ka zënë dromosfobia. Mendova të të ftoj 2-3 herë të inaugurojmë se bashku por druaj se kjo kurë nuk të nxjerr nga sindromi ku ke rënë. E ke gjet ilaçin, ti rri në autobus, ne do shtrojmë rrugët”.

Shqipëria e zhvilluar, vepër e reformave të reja
Kryeministri Sali Berisha deklaroi gjatë Konventës së Partisë Demokratike për Shqipërinë e Zhvilluar se, rruga e zhvillimit është një rrugë me vështirësi, por për shqiptarët është një rrugë me shpresë të madhe. “Pjesëmarrja masive në këtë fushatë buron nga shpirti i shqiptarëve për projektet e Shqipërisë së zhvilluar dhe europiane. Shqiptarët në të 4 anët e vendit e prekin dhe e ndiejnë, janë të sigurt se po ecin të sigurt në mandatin e tretë të Shqipërisë Europiane. Shqiptarët mbushin sheshet tona se kanë besim se në 4 vitet e ardhshme do të kapim Shqipërinë e zhvilluar dhe Europiane”, tha Berisha. Sipas kreut të qeverisë, “shqiptarët që nisën rrugën e lirisë nga nivelet më ekstremiste të mjerimit në botë, ndihen krenar që në këto vite e rritën vendin e tyre , 11 herë, sa asnjë vend tjetër në Europë dhe në botë”. “Shqipëria e zhvilluar është vepër e të rinjve shqiptarë, atdhetarë që në këto vite me energjinë dhe entuziazmin e tyre i dhanë Shqipërisë ecjen dhe vrapin e tyre. Shqipëria e zhvilluar është vepër e vajzave, grave dhe nënave shqiptare, roli i të cilave bëhet gjithmonë e më i madh. Shqipëria e zhvilluar është vepër e qindra mijëra shqiptarëve që çelën dhe lulëzuan bizneset e tyre, punësuan dhe rritën prodhimet e tyre. Shqipëria e zhvilluar është vepër e fermerëve shqiptarë që nxjerrin nga toka prodhimet e tyre. Shqipëria e zhvilluar është vepër e burrave dhe grave, djemve dhe vajzave që e duan atë me gjithë shpirt dhe çdo ditë vendosin të bëjnë diçka të re”, tha Berisha. “Shqipëria e zhvilluar është vepër e reformave të reja, sistemit arsimor, pasi vetëm një Shqipëri e dijes, arsimit dhe kulturës do të kap nivelet më të larta të zhvillimit. Gara e dijes është gara më madhe e të gjitha kohrave dhe shqiptarët do ta fitojnë atë. Sot shqiptarët kanë 4-fishuar numrin e të diplomuarve dhe studentëve. Sot dhjetra mijëra shqiptarë diplomohen në universitet më të mira të botës. Arsimi dhe dija është beteja më e madhe, ndaj jemi të vendosur të bëjmë gjithçka për shkollimin më cilësor të shqiptarëve në të gjithë nivelet. Ndërtuam mbi 1300 shkolla dhe do të rindërtojmë çdo shkollë”, theksoi Berisha. Zhvillimi i Shqipërisë, tha Berisha, “është rezultat i infrastrukturës moderne. Shqipëria me infrastrukturë moderne do të bëjë të mundur shfrytëzimin e pasurive të saj përrallore kudo”. Vetëm pak vite më parë, tha kryeminsitri Berisha, “ishim vendi që na mungonin dritat, uji, shkollat, na rrënoheshin rrugët, spitalet, jo se Shqipëria ishte e varfër, por sepse ajo dergjej në kthetrat e shokëve socialistë. Në pak vite e shndërruam energjinë në shtyllë kryesore të ekonomisë tone”. Sipas kryeministrit Berisha, në 4 vitet që vijnë Shqipëria do të tërheqë 6 miliardë dollarë investime të huaja. “4 vitet që vijnë do të trefishojmë grantet dhe mbështetjen për fermerët shqiptarë. 4 vitet që vijnë do të shkojë në 7 milionë numri i turistëve”- deklaroi kryeministri.
Premtimet e kryeministrit: 250 mijë vende të reja pune dhe 6 miliardë dollarë të investime
“4 vitet që vijnë, 250 mijë vende të reja pune, 6 miliard dollarë investime të huaja do të tërheqë ky vend, do të trefishohen grantet dhe mbështetja për fermerët shqiptarë. 4 vitet që vijnë do arrijë në 7 milionë numri i turistëve në Shqipëri. 4 vitet që vijnë do bëjmë gjithçka për të zbarkuar në Shqipëri gjigandët e Hitech dhe industrisë së makinave me regjim fiskal 5 vjet pa asnjë taksë dhe detyrim tatimor. Vitet që vijnë vitet vendimtare të integrimit Europian. Së bashku do marrim statusin dhe do ecim të vendosur drejt Europës dhe BE”