Rama shpalli paketën ligjore antiprotestë, Bardhi: Antikushtetuese

Kryetari i grupit parlamentar të PD-së, Gazment Bardhi, ka reaguar pas prezantimit nga kryeministri Edi Rama të paketës së re ligjore kundër dhunës dhe anarkisë urbane, duke e cilësuar atë antikushtetuese dhe një përpjekje për të kufizuar protestat.

Bardhi akuzoi Ramën se po merr përsipër përgjegjësinë për dhunën policore ndaj studentëve dhe të rinjve, ndërsa deklaratat e kryeministrit i cilësoi kërcënime ndaj qytetarëve që kundërshtojnë qeverinë.

“Sapo shpalli diktaturën! Të paktën në mendjen e tij të sëmurë. Sepse harron një gjë: shqiptarët nuk do të pranojnë kurrë të kthehen 36 vite pas, vetëm për të mbrojtur karrigen e Edi Ramës.

Edi Rama mori përsipër përgjegjësinë për dhunën policore ndaj studentëve dhe të rinjve, ndërsa paralajmëroi se do t’ia nxjerrë sytë kujtdo që proteston. Do t’ia mbyllë gojën kujtdo. Do ta burgosë këdo. Do ta gjobisë këdo”, deklaroi Bardhi.

Kryetari i grupit parlamentar të PD-së tha se deklaratat e kryeministrit tregojnë, sipas tij, frikën nga protestat studentore dhe nga mundësia për t’u përballur me përgjegjësi përpara drejtësisë.

“Ky që patë sot është Edi Rama i vërtetë: një diktator hajdut, i gatshëm t’i bëjë vendit të keqen më të madhe për të mbajtur karrigen e tij. Sot patë një Edi Ramë më të dobët se kurrë, që përballet me protestat e studentëve dhe sheh tek ato një sfidë të drejtpërdrejtë për pushtetin e tij dhe rrezikun e përgjegjësisë përpara drejtësisë”, u shpreh ai.

Sponsorizuar

Bardhi e cilësoi paketën e prezantuar nga Rama si një nismë kundër studentëve dhe protestuesve, duke paralajmëruar se propozimet e qeverisë nuk do të zbatohen.

“Asgjë nga ato që tha nuk ka për t’u realizuar. Çdo germë e paketës ‘Kundër Studentëve’ është antikushtetuese”, theksoi Bardhi.

Në përfundim, deputeti demokrat e cilësoi Ramën si një kryeministër politikisht të mbaruar, duke deklaruar se asnjë kërcënim nuk do të ndalë, sipas tij, vullnetin e qytetarëve për mirëqeverisje, liri, drejtësi dhe demokraci.

“Edi Rama është një kryeministër politikisht i mbaruar. Numërimi mbrapsht ka nisur. Asnjë kërcënim nuk do ta ndalë vullnetin e qytetarëve për mirëqeverisje, liri, drejtësi dhe demokraci”, përfundoi Bardhi.