Raporti: Bota po bëhet më pak paqësore. Islanda, vendi më i qetë

Uashington- Indeksi Global i Paqes 2013, në një studim të ri thotë se rritja e numrit të vrasjeve dhe rritja e shpenzimeve ushtarake nga disa vende janë duke e bërë botën një vend më pak paqësor.

Kosova ndërkaq në mesin e 162 shteteve të monitoruara gjendet në vendin e 72-të, prapa Shqipërisë(69) e Serbisë (62), por para Malit të Zi e Maqedonisë që listohen në vendin e 73-të, përkatësisht 79-të, transmeton Radio Evropa e Lirë.

Raporti tha se Rusia dhe Euroazia mbetën ndër rajonet më pak paqësore në botë, prapa dy rajoneve tjera që janë edhe më pak paqësore, Azisë Jugore dhe Lindjes së Mesme e Afrikës së Veriut. Ndërsa Islanda është vendi më i qetë, ndërsa Afganistani është në fund të listës së të qenit paqësor.

Sipas tij, 110 vende u bënë më pak paqësore në vitin e kaluar, ndërsa 48 vende u bënë më paqësore. Studimi përmendi luftën civile siriane, dhe shpenzimet e rritura ushtarake në Iran, Irak, Afganistan dhe vende të tjera.

Ai kryhet çdo vit nga Instituti për Ekonomi dhe Paqe, së bashku me një panel ndërkombëtar ekspertësh të pavarur.