Raporti i INSTAT, sfidat e bujqësisë dhe luhatjet strukturore në blegtori

Instituti i Statistikave (INSTAT) ka publikuar raportin vjetor mbi sektorin e bujqësisë dhe blegtorisë për vitin 2025. Të dhënat administrative të mbledhura në terren nga Ministria e Bujqësisë dhe Zhvillimit Rural dëshmojnë për një rritje të qëndrueshme në disa kultura specifike dhe në prodhimin e mishit e të mjaltit, por nga ana tjetër konfirmojnë rënie të ndjeshme në sektorin e derrave, shpendëve dhe në prodhimin e drithërave bazë si gruri.

Bujqësia, dominon Qarku Fier, bien pemëtoret dhe gruri

Gjatë vitit 2025, prodhimi total bujqësor në vend shënoi vlerën 9.731.031 tonë. Sektori i perimeve shënoi rritje me 1.5%, duke arritur në mbi 1.4 milionë tonë, ku Fieri, Tirana dhe Berati mbajnë peshën kryesore me 62% të prodhimit. Megjithatë, prodhimi i grurit pësoi një goditje duke u zvogëluar me 10.1%, ndryshe nga elbi që u rrit me 13.6%.

Luhatje u vunë re edhe në strukturën e serrave, të cilat përfaqësojnë 22.1% të perimeve gjithsej, por me një rënie vjetore prej 0.9%. Qarku i Fierit mbetet lider absolut i serrave duke kontribuar me gati gjysmën e prodhimit kombëtar.

Rënia më e fortë në sektorin e bimësisë u vu re te pemët frutore, të cilat shënuan një tkurrje prej 12.8%, me Korçën si kontribuesin kryesor në pemët farore (ku molla zë 81.8%). Edhe prodhimi i ullinjve shënoi një rënie të lehtë prej 2.3%, duke zbritur në 143.383 tonë.

“Perimet e njoma përbëjnë 65.8% të prodhimit total, duke shënuar një rritje prej 1.07%, krahasuar me vitin e kaluar. Perimet e thata kanë pësuar rënie, krahasuar me vitin 2024, me 6.7% të prodhimit të kësaj kategorie,” saktëson raporti i INSTAT mbi strukturën e kulturave bujqësore.

Blegtoria, tkurrje te shpendët dhe derrat, shtohen gjedhët dhe bletaria

Sektori blegtoral ka dëshmuar lëvizje të forta strukturore. Numri i gjedhëve u rrit me 1.1%, duke arritur në 275 mijë krerë, ku sërish Fieri (13.9%) dhe Korça (12.6%) udhëheqin mbarështimin. Lajmi pozitiv vjen nga prodhimi i mishit në peshë të gjallë, i cili u rrit me 2.5%, dhe nga bletaria, ku numri i koshereve u zgjerua me 9.8%, duke sjellë 6,299 tonë mjaltë (rritje me 6%).

Në krahun tjetër, të gjitha kategoritë e tjera blegtorale shënuan rënie. Numri i të leshtave ra me 0.9%, i dhive me 7.4%, ndërsa rënia më drastike u regjistrua te derrat me një tkurrje prej 28.2%, duke zbritur nga 104 mijë në vetëm 75 mijë krerë në shkallë vendi. Lezha dhe Shkodra mbeten zonat me përqendrimin më të madh të derrave me mbi 71% të totalit.

Edhe sektori i shpendëve pësoi rënie, ku numri i pulave ra me 8.3%. Kjo solli një rënie të ndjeshme në prodhimin e vezëve:

“Edhe pse në vitin 2024 u prodhuan 888 milionë vezë, në vitin 2025 prodhimi ka rënë në 837 milionë, me një ndryshim prej −5.8%,” konfirmon dokumenti statistikor.

Sa i përket qumështit, prodhimi mbeti thuajse i palëkundur (rënie minimale prej 0.1%), duke shënuar 868.281 tonë, ku qumështi i lopës vijon të jetë burimi kryesor absolut me 85.7% të peshës totale në treg.

Ndryshimet kryesore në Blegtori (2024 vs 2025)

Për të pasur një pasqyrë të qartë të lëvizjeve të krerëve dhe prodhimit blegtoral, tabelat e mëposhtme detajojnë ndryshimet kryesore vjetore:

Metodologjia e INSTAT saktëson se mbledhja e këtyre të dhënave bëhet në terren nga specialistët e ekstensionit përmes intervistave direkte me fermerët, të cilat më pas kryqëzohen me të dhënat zyrtare të shërbimit veterinar shtetëror dhe veterinerëve privatë për të garantuar saktësinë e inventarit përpara publikimit.

/rtsh.al/