Reagon mazhoranca: Deputetët e PS, pasuri të vëna nga krimi dhe kontrabanda

“Referendumi popullor do të rrëzojë ‘murin e korrupsionit’ të miliarderëve të PS-së”

Mazhoranca artikulon qëndrimin e saj zyrtar lidhur me çështjen e imunitetit, “zhveshja” e të cilit do të bëhet nga vota e qytetarëve përmes referendumit popullor si dhe akuzon sërish deputetët e grupit parlamentar të PS, se gëzojnë pasuri të vënë në kundërshtim me ligjin si, nga fshehja e taksave, kontrabanda, trafiqet kriminale, ndërtimet pa leje dhe grabitja e pronave.
Në një deklaratë për shtyp, zëdhënësja e PD, Silvi Bardhi tha se për të mbrojtur aktin e papërgjegjshëm, lidershipi socialist, Edi Rama ka rreshtuar mediat që kontrollon në fushatë absurde kundër heqjes së imunitetit. Ajo tha se më këtë qëndrim, Rama dhe miliarderët imunitarë të Partisë Socialiste që i bllokojnë për të tretin vit me radhë Shqipërisë statusin e vendit kandidat, dëshmojnë qartë dhe përfundimisht se ata nuk mund të pranojnë kurrsesi heqjen e imunitetit.
“Pasi bllokoi më datë 6 gusht heqjen e imunitetit dhe marrjen e statusit të vendit kandidat për Shqipërinë,.Edi Rama ka angazhuar mediat që kontrollon dhe specialistët e Partisë në një fushatë absurde dhe të diskretituar botërisht kundër heqjes së imunitetit nëpërmjet referendumit popullor si një e drejtë kushtetuese e qytetarëve shqiptarë. Me këtë qëndrim Edi Rama dhe miliarderët imunitarë të Partisë Socialiste që i bllokojnë për të tretin vit me radhë Shqipërisë statusin e vendit kandidat, dëshmojnë qartë dhe përfundimisht se ata nuk mund të pranojnë kurrsesi heqjen e imunitetit sepse janë të tmerruar nga origjina e qindra miliarda lekëve të kupolës së partisë. Çdo qytetar konstaton se Rama dhe zëdhënësit e tij, bllokimin e heqjes së imunitetit dhe të marrjes së statusit të vendit kandidat po e gërshetojnë këto ditë me mbrojtjen fanatike të përditshme të pasurive të miliarderëve në krye të Partisë Socialiste dhe origjinës së këtyre pasurive nga fshehja e taksave, kontrabanda, trafiqet kriminale, ndërtimet pa leje dhe grabitja e pronave”, u shpreh Bardhi.
PD tha se Rama dhe zëdhënësit e tij kanë harruar dhe nuk flasin më për rrogat, pensionet, punësimin dhe ndihmën ekonomike që janë dhe interesat jetike të qytetarëve të thjeshtë, ndërsa shtoi se udhëheqja e Partisë Socialiste që kundërshton prej 10 vitesh me radhë heqjen e imunitetit dhe tani së fundi bllokoi për të tretin vit me radhë statusin e vendit kandidat, beson verbërisht se imuniteti është si të thuash, këmisha e tyre e lindur që i qëndron në AND-në e neo-bllokmenëve të trashëguar nga etërit e tyre, prandaj dhe ata që e ndjejnë veten si të lindur me imunitet nuk mund të pranojnë kurrë ta heqin atë dhe të barazohen para ligjit me qytetarët e thjeshtë, pavarësisht dëmit të pallogaritshëm që i bëjnë vendit, para së gjithash duke bllokuar statusin e vendit kandidat dhe integrimin e tij në Bashkimin Europian.
Në kontrast me PS, Bardhi tha se Partia Demokratike lufton prej 10 vitesh për arritjen e një marrëveshjeje për heqjen e imunitetit dhe është ajo që pranoi korrikun e kaluar të gjitha amendamentet e Partisë Socialiste për ligjin për heqjen e imunitetit, pasi e konsideron heqjen e imunitetit jetike për të ardhmen evropiane të Shqipërisë dhe shqiptarëve si dhe për luftën kundër krimit dhe korrupsionit që përdorin si mburojë murin e imunitetit.
Gjithashtu, zëdhënësja e PD theksoi se “mazhoranca mbetet e sigurt dhe e bindur se do të jenë qytetarët shqiptarë që në referendumin popullor me votën e tyre të lirë do të shembin së shpejti murin e imunitetit që i ndan ata nga deputetët, qeveritarët dhe gjykatësit e tyre, do të shndërrojnë Shqipërinë në vendin e qytetarëve të barabartë para ligjit në një vend me të ardhme të sigurt Evropiane, të cilën ata e meritojnë”.